“Alarm! Gjermania po riarmatoset.” Me këtë titull në kopertinë, revista franceze “Marianne” i zgjoi së fundmi lexuesit e saj nga përgjumja e verës. Ky paralajmërim sensacionalist është një nga shenjat e shumta të një klime të re në Francë: frika e vjetër ndaj dominimit gjerman është rikthyer.
Artikulli i “Marianne”-s përshkruan se si Bundeswehr-i, dikur “fëmija i lënë pas dore” i shtetit, i themeluar me qëllime thjesht mbrojtëse dhe nën mbikëqyrje të rreptë parlamentare, është shndërruar në “prioritetin kryesor” të Gjermanisë.
Gjermania synon ta bëjë sërish Bundeswehr-in “të aftë për luftë”. Kjo është e domosdoshme duke pasur parasysh peizazhin e ri të kërcënimeve dhe agresionin e Moskës; madje, nga këndvështrimi i Parisit, kthesa historike u mirëprit fillimisht si një hap që duhej të ishte ndërmarrë kohë më parë.
Ambicia e shprehur e Berlinit për të ndërtuar “ushtrinë konvencionale më të fuqishme në Evropë” deri në vitin 2039 – siç u shpreh ministri i Mbrojtjes, Boris Pistorius (SPD), gjatë prezantimit të strategjisë së Bundeswehr-it – ngriti pikëpyetje fillestare në Francë: Si do ta menaxhojë fqinji gjerman, i cili për dekada të tëra u përpoq të qëndronte jashtë gjithçkaje dhe të ruante neutralitetin, ngjashëm me Zvicrën, këtë rritje të fuqisë?
Rishfaqja e fuqisë ushtarake gjermane po i shqetëson fqinjët e saj evropianë, në një atmosferë që përfshin dyshimet e Polonisë, kritikat e Italisë dhe pikëpyetjet e Spanjës lidhur me orientimin e saj pro-amerikan. Edhe partnerët evropianë po shfaqin njëfarë skepticizmi. Polonia duket se është vendi më i shqetësuar për një Gjermani të “rimilitarizuar”.
Në Varshavë, një pjesë e klasës politike ushqen një narrativë mosbesimi ndaj Berlinit, duke e akuzuar atë se e ka nënvlerësuar prej vitesh kërcënimin rus.
Edhe Italia i sheh me rezerva nismat gjermane. Në një raport të vitit 2024, ish-presidenti i Bankës Qendrore Evropiane, Mario Draghi, paralajmëroi kundër “fragmentimit të tepërt të bazës industriale [të mbrojtjes], të përkeqësuar nga mungesa e koordinimit lidhur me ndërveprueshmërinë e pajisjeve”.
Në Madrid, marrëdhëniet e qeverisë socialiste me presidentin amerikan janë veçanërisht të tensionuara, ashtu siç janë edhe ato me qëndrimin e hapur atlantist të Berlinit.
Në gazetën “El País”, redaksia vuri në dukje blerjen e avionëve F-35 nga Uashingtoni; një blerje që mbart “kosto të fshehura” në çdo fluturim, varur nga drita jeshile që do të japë [Trump] – pronari tejet i paparashikueshëm i Pentagonit.
