Maroku: Nuk ka prova që vërtetojnë përfshirjen e Rabatit në kalimin masiv të emigrantëve në Ceuta

Ministria e Jashtme e Marokut deklaroi të enjten se nuk ka prova që vërtetojnë përfshirjen e Rabatit në kalimin masiv në enklavën spanjolle të Ceutës në korrik, duke hedhur poshtë edhe pretendimet se janë përfshirë në betejat e brendshme politike të Spanjës.

Më shumë se 70,000 njerëz kaluan nga Maroku në Ceuta, duke nxitur kritika në Spanjë si ndaj Rabatit ashtu edhe ndaj kryeministrit Pedro Sanchez.

Ndërsa shumica janë kthyer që atëherë, mbi 100 persona kanë vdekur, sipas OJQ-ve. Autoritetet lokale thonë se mijëra, përfshirë të mitur të pashoqëruar, mbeten në enklavë, duke jetuar në kampe të improvizuara ose në rrugë dhe plazhe, duke nxitur protesta pothuajse të përditshme nga banorët e zemëruar ndaj mënyrës se si qeveria spanjolle e ka trajtuar krizën.

Partitë opozitare të Spanjës që atëherë kanë vënë në shënjestër marrëdhënien e qeverisë së Pedro Sanchez me Marokun dhe kanë akuzuar Rabatin për lehtësimin ose orkestrimin e kalimit kufitar.

“Pse të vazhdojmë të ngremë akuza kundër Marokut kur asnjë provë, fakt apo raport nuk vërteton ndonjë përfshirje nga ana e autoriteteve marokene?”, tha ministria në një deklaratë.

“Pse nuk po kthehen emigrantët e paligjshëm, edhe pse qeveria marokene është zotuar zyrtarisht t’i ripranojë ata? Pse të miturit e pashoqëruar po mbahen larg familjeve të tyre, kur Maroku ka kërkuar urgjentisht kthimin e tyre?” tha ministria.

Raportet e publikuara nga qeveria spanjolle të mërkurën treguan se agjencitë spanjolle të inteligjencës dhe sigurisë kishin paralajmëruar si homologët e Madridit ashtu edhe ata marokenë për mundësinë e një kalimi masiv kufitar.

“Maroku refuzon të përdoret si një gur shahu politik parazgjedhor, as nuk pranon të bëhet kurban në larjen e hesapeve politike”, tha ministria.