Kuvendi i Kosovës rikthehet sot në seancë për të vijuar procesin e konstituimit të Legjislaturës së 11-të. Punimet do të nisin në orën 11:00, ndërsa në rend dite është vetëm zgjedhja e pesë nënkryetarëve.
Për këto pozita janë propozuar tashmë kandidatët nga subjektet politike dhe komunitetet joshumicë.
Lëvizja Vetëvendosje ka propozuar Ardian Golën, PDK-ja Vlora Çitakun, ndërsa LDK-ja Kujtim Shalën. Për përfaqësimin e komunitetit serb, Lista Serbe ka nominuar Slavko Simiqin, ndërsa për komunitetet e tjera joshumicë është propozuar Emilia Rexhepi.
Zgjedhja e nënkryetarëve vjen pas një seance të tensionuar, ku deputetët nuk arritën të gjejnë dakordësi për mënyrën e votimit.
Një ditë më parë, Kuvendi zgjodhi Albulena Haxhiun në krye të institucionit. Ajo mori 62 vota pro, 16 kundër dhe 13 abstenime, nga 102 deputetë të pranishëm.
Pas këtij votimi, seanca vijoi me procedurën për zgjedhjen e nënkryetarëve, por procesi u përplas me mosmarrëveshje mes subjekteve politike.
Debati u ashpërsua edhe gjatë paraqitjes së kandidaturës së Listës Serbe. Deputeti Igor Simiq, teksa propozoi Slavko Simiqin, deklaroi se kandidatura bëhej “në emër të popullit serb”.
Kjo deklaratë u kundërshtua nga kryetarja e Kuvendit, Albulena Haxhiu, e cila kërkoi që propozimi të bëhej në përputhje me Kushtetutën dhe Rregulloren e Kuvendit. Simiq nuk e tërhoqi deklaratën, ndërsa Haxhiu i ndërpreu fjalën.
Për shkak të mungesës së një marrëveshjeje për procedurën e votimit, punimet u ndërprenë dhe u vendos që seanca të vijojë sot.
Me zgjedhjen e pesë nënkryetarëve pritet të përmbyllet edhe procesi i konstituimit të Kuvendit të Kosovës për Legjislaturën e 11-të.
