Qeveria ka reaguar pas publikimit të një audiopërgjimi nga ish-zëvendëskryeministri Arben Ahmetaj, i cili shoqëroi materialin me akuza për trafik armësh dhe përfshirje të zyrtarëve në çështje të rënda.
Ministrja e Shtetit për Marrëdhëniet me Parlamentin, Eriona Ismaili, ka refuzuar të komentojë përmbajtjen e audiopërgjimit, ndërsa ka zgjedhur t’i drejtohet drejtpërdrejt Ahmetajt.
Ismaili i ka bërë thirrje ish-zëvendëskryeministrit që të kthehet në Shqipëri dhe të përballet me drejtësinë, duke e cilësuar atë si një person “të arratisur nga drejtësia”. Ajo tha se Ahmetaj duhet të ketë të njëjtin guxim edhe përballë drejtësisë shqiptare, nëse pretendimet e tij i bën publike nga jashtë vendit.
“Më vjen ndot të jap përgjigje për deklarimet të të arratisurve nga drejtësia e Republikës së Shqipërisë. Është një kërkesë që dua t’ia bëj në mënyrë direkte personit që ka nxjerrë këto përgjime, sikurse ka guximin që të hedhë llum mbi projekte të qeverisë shqiptare, të gjejë guximin dhe të vijë të përballet me drejtësinë shqiptare. Më vjen dot të jap përgjigje të deklaratave të bëra publike nga njerëz që janë zhdukur në llumin e tyre”, tha Eriona Ismaili.
Reagimi i qeverisë vjen në një kohë kur audiopërgjimi i publikuar nga Ahmetaj ka hapur një tjetër debat mbi akuzat për trafik armësh dhe rolin që pretendohet se kanë pasur persona të lidhur me çështjen.
Ndërsa opozita ka kërkuar hetim parlamentar për pretendimet e bëra publike, qeveria ka zgjedhur të mos komentojë përmbajtjen e regjistrimit dhe ta zhvendosë debatin te statusi i Ahmetajt përballë drejtësisë shqiptare.
