Gjykata e Shkodrës ka lënë në burg Andri Vulajn, i dyshuar për vrasjen e Ylber Lulit, ngjarje që tronditi qytetin më 8 shtator. Përballë gjykatës, i riu ka zgjedhur të mos flasë për atë që ndodhi, ndërsa mbrojtja ka ngritur pikëpyetje mbi plagët që ai vetë ka marrë gjatë përplasjes.
Avokati Arbër Raja tha se klienti i tij është i dëmtuar në fytyrë, qafë dhe në krah, duke kërkuar që prokuroria të hetojë rrethanat në të cilat janë shkaktuar këto plagë.
Në anën tjetër, akuza ka paraqitur në seancë dinamikën që, sipas saj, çoi në vrasjen e Lulit. Nga hetimet rezulton se gjithçka dyshohet të ketë nisur pas një konflikti të mëparshëm mes dy të rinjve, i cili fillimisht ka ndodhur në një lokal në pedonalen e Shkodrës.
Shkëndija e debatit, sipas prokurorisë, ka qenë një përplasje banale mes tyre, me fjalët “pse më sheh”. Por konflikti nuk është mbyllur aty.
Më vonë, Vulaj ka shkuar pranë banesës së Lulit, i shoqëruar nga dy persona që viktima i njihte. Sipas akuzës, vetë Luli u kishte kërkuar dy shokëve që ta shoqëronin Vulajn në shtëpi, me qëllim që të sqaronin problemet mes tyre.
Situata ka degjeneruar në përleshje fizike. Në këtë moment, sipas versionit të prokurorisë, Vulaj është plagosur me thikë dhe më pas ka përdorur një armë zjarri, duke qëlluar nga afër në drejtim të Lulit.
Plumbi e ka kapur të riun në bark dhe i ka shkaktuar vdekjen.
Një nga dëshmitë e administruara nga prokuroria është ajo e babait të viktimës, Qamil Luli. Ai ka treguar se ishte në gjumë kur dëgjoi zhurmat e sherrit dhe doli në oborr për të parë se çfarë po ndodhte.
Sipas dëshmisë së tij, gjatë përleshjes është goditur me thikë edhe Vulaj. Pak më pas, djali i tij Ylber Luli është qëlluar me armë zjarri.
Prokurorja Albulena Kuliçi kërkoi masën “arrest me burg” për Vulajn, kërkesë që u pranua nga gjyqtarja Zamira Lila.
Ndërkohë, mbrojtja pritet të shqyrtojë provat dhe aktet e administruara nga prokuroria përpara se i dyshuari të japë versionin e tij mbi ngjarjen. Sipas burimeve, Vulaj ndodhet në gjendje të rënduar psikologjike dhe deri tani nuk ka dhënë asnjë dëshmi lidhur me vrasjen.
