Prej orësh, qindra shqiptarë të diasporës që po udhëtonin drejt Shqipërisë për t’iu bashkuar protestës qytetare kundër Edi Ramës dhe qeverisë së tij, ishin bllokuar në Malin e Zi.
Sipas njoftimeve të publikuara në faqen e Instagramit të kolonës së diasporës “Për flamur e për Atdhe”, situata është zhbllokuar. Emigrantët pretendojnë se policia malazeze i ka lejuar të vijojnë lëvizjen, por i ka shoqëruar në drejtim të Kosovës.
Pas kalimit në Kosovë, autokolona me shqiptarët e diasporës pritet të hyjë në Shqipëri dhe të vijojë rrugën drejt Tiranës, ku synon t’i bashkohet protestës mbarëqytetare.
Protesta, e parashikuar të zhvillohet më 12 shtator, ka në qendër kërkesën për dorëheqjen e kryeministrit Edi Rama dhe të qeverisë së tij.
Bllokimi i autokolonës në Malin e Zi ka shkaktuar reagime të shumta, ndërsa më herët janë publikuar edhe pretendime se bëhet fjalë për rreth 15 automjete me emigrantë të ndaluara në territorin malazez.
