Amir Rrahmani ka marrë një vendim të bujshëm duke njoftuar pensionimin e tij nga Kombëtarja e Kosovës. Kapiteni i “Dardanëve” e bëri të ditur vendimin përmes një postimi në rrjetet sociale.
Rrahmani ka deklaruar se nuk do të luajë më për Kosovën për sa kohë Federata e Futbollit të Kosovës drejtohet nga personat aktualë.
Qendërmbrojtësi i Napolit ka kritikuar ashpër situatën në FFK dhe mënyrën se si janë trajtuar problemet e lojtarëve.
“Pas 10 viteve në Kombëtare, nga të cilat 7 vite si kapiten, ju njoftoj se nuk do të jem më pjesë e Kosovës përderisa FFK-në e udhëheqin personat aktualë”, shkroi Rrahmani.
Ai pretendon se ka pasur kundërshtime të vazhdueshme dhe mungesë të njerëzve kompetentë për të adresuar shqetësimet e futbollistëve.
Rrahmani thotë gjithashtu se, në vend të mbështetjes, ka përjetuar sulme të vazhdueshme dhe të koordinuara gjatë dy viteve të fundit.
“Drejtësia do ta vërtetojë një ditë”, ka deklaruar kapiteni në mesazhin e tij.
Gjatë ditës së sotme u raportua gjithashtu se Rrahmani ka angazhuar firmën ligjore Hodaj & Partners për ta përfaqësuar lidhur me pretendimet për cenim të reputacionit të tij.
Rrahmani ishte pjesë e Kosovës që prej vitit 2016, pasi më parë kishte përfaqësuar Kombëtaren e Shqipërisë.
Në shtatë vitet e fundit ai mbajti shiritin e kapitenit, pas pensionimit të Samir Ujkanit. Në total, mbrojtësi ka zhvilluar 66 ndeshje me Kosovën dhe ka shënuar shtatë gola.
Në nivel klubesh, Rrahmani është pjesë e Napolit dhe ka fituar dy herë titullin kampion në Serie A, në vitet 2023 dhe 2025.
Pensionimi i tij përbën një goditje të madhe për Kosovën, e cila humbet kapitenin dhe një prej lojtarëve më të rëndësishëm të saj.
