Në Prishtinë zhvillohet sot “Marshi për Liri”, një tubim në mbështetje të ish-krerëve të Ushtrisë Çlirimtare të Kosovës që po gjykohen në Hagë. Marshimi zhvillohet vetëm katër ditë para shpalljes së aktgjykimit përfundimtar në çështjen ndaj Hashim Thaçit, Kadri Veselit, Rexhep Selimit dhe Jakup Krasniqit.
Marshi është parashikuar të nisë nga sheshi “Skënderbeu”, ndërsa qytetarë të shumtë janë mbledhur që prej orëve të para në qendër të Prishtinës.
Kryetari i Komunës së Prishtinës, Përparim Rama, ka njoftuar se transporti publik në kryeqytet do të jetë falas gjatë ditës së sotme. Transport falas drejt Prishtinës është organizuar edhe nga qytete të tjera të Kosovës për qytetarët që dëshirojnë të marrin pjesë në marsh.
Në prag të aktgjykimit të 16 shtatorit Marshi, i organizuar nga lëvizja qytetare “Liria ka Emër”, zhvillohet në fazën përfundimtare të procesit gjyqësor ndaj katër ish-krerëve të UÇK-së.
Thaçi, Veseli, Selimi dhe Krasniqi akuzohen për krime lufte dhe krime kundër njerëzimit, akuza të cilat të katër të pandehurit i kanë mohuar.
Në programin e marshit janë parashikuar fjalime nga kryetarët e PDK-së dhe AAK-së, Bedri Hamza dhe Ardian Gjini, si dhe nga përfaqësues të “Liria ka Emër”, shoqatave të dala nga lufta dhe familjeve të dëshmorëve. Tubimi pritet të shoqërohet edhe me këngë patriotike.
Protestat në mbështetje të ish-krerëve të UÇK-së
“Marshi për Liri” nuk është tubimi i parë i këtij lloji në Kosovë. Në prill 2023, një ditë para nisjes së gjykimit ndaj Thaçit, Veselit, Selimit dhe Krasniqit, mijëra qytetarë marshuan në Prishtinë në mbështetje të tyre, duke e cilësuar procesin si të padrejtë dhe duke shprehur përkrahje për luftën e UÇK-së.
Një tjetër tubim i madh u zhvillua më 17 shkurt 2026, në 18-vjetorin e pavarësisë së Kosovës, me marshimin “Drejtësi, jo politikë”.
Ndërkohë, procesi në Hagë ka kaluar në të gjitha fazat kryesore të gjykimit. Prokuroria përfundoi paraqitjen e çështjes në prill 2025, ndërsa mbrojtja e përfundoi rastin në dhjetor të po atij viti. Deklaratat përmbyllëse u mbajtën në shkurt 2026.
Shpallja e aktgjykimit ishte parashikuar më herët, por u shty. Në korrik, Dhomat e Specializuara njoftuan se verdikti do të shpallej më 16 shtator, duke e lidhur shtyrjen me kompleksitetin e çështjes dhe volumin e madh të provave.
Në aktakuzë, prokuroria pretendon se katër ish-krerët e UÇK-së mbajnë përgjegjësi penale për krime të kryera në Kosovë dhe në veri të Shqipërisë gjatë periudhës së luftës.
Aktakuza përfshin gjashtë pika për krime kundër njerëzimit dhe katër për krime lufte. Prokuroria ka kërkuar dënim me nga 45 vite burgim për secilin prej të akuzuarve.
Të katër ish-krerët e UÇK-së u arrestuan në nëntor 2020 dhe u transferuan në qendrën e paraburgimit të Dhomave të Specializuara në Hagë. Gjykimi ndaj tyre nisi më 3 prill 2023.
Aktgjykimi i 16 shtatorit pritet të jetë një prej vendimeve më të rëndësishme të Dhomave të Specializuara të Kosovës, të krijuara në vitin 2015 për shqyrtimin e rasteve që lidhen me pretendime për krime të kryera nga pjesëtarë të UÇK-së gjatë dhe pas luftës së viteve 1998-1999.
