Vendimi i fundit i qeverisë për t’i vënë në dispozicion kompanisë “Omnix Albania” rreth 9 hektarë tokë shtetërore në Gjirin e Lalëzit, kundrejt tarifës simbolike prej 1 euro, rikthen në vëmendje një emër jo pak të përfolur në botën e ndërtimit, Shkëlqim Beshirin.
Ai nuk është thjesht një prej biznesmenëve që qëndrojnë pas projektit. Përmes kompanisë “KLAR”, Beshiri kontrollon 50% të kapitalit të “Omnix Albania”, duke qenë aksioneri më i madh i saj.
Por emri i tij bëhet politikisht edhe më interesant për një arsye tjetër.
Prej vitesh, në media Shkëlqim Beshiri është përfolur për lidhje të afërta biznesi me Shkëlzen Berishën, djalin e ish-kryeministrit dhe kryetarit të Partisë Demokratike, Sali Berisha. Në disa prej këtyre publikimeve është shkuar edhe më tej, duke e cilësuar Beshirin si “prestanome” apo “lavatriçe” të pasurive të Shkëlzen Berishës.
Por zgjerimi i aktivitetit të Beshirit në sektorin e ndërtimit e bëjnë të rëndësishme pyetjen: kush është biznesmeni që sot përfiton nga një tjetër vendim i qeverisë së Edi Ramës?
Në pamje të parë, profili i Beshirit nuk të çon domosdoshmërisht te një prej emrave më të mëdhenj të ndërtimit në Shqipëri. Emri i tij është lidhur edhe me aktivitete shumë më modeste, mes tyre bare dhe kafene në Tiranë. Por pas kësaj fasade gjendet një aktivitet shumë më i gjerë. Përmes kompanive të lidhura me të, emri i Shkëlqim Beshirit shfaqet në projekte ndërtimi për banim, turizëm dhe zhvillime të mëdha në disa prej zonave ku toka dhe metri katror kanë marrë vlerat më të larta në vend.
Një nga kompanitë që është përmendur vazhdimisht në raportimet për të është “LIM-EM”. Pikërisht rreth kësaj shoqërie janë ngritur edhe disa prej akuzave më të forta mediatike për marrëdhëniet e tij me Shkëlzen Berishën.
Pretendimet janë se Beshiri është pronari formal i kompanisë, ndërsa pas saj qëndrojnë interesa të lidhura me djalin e ish-kryeministrit. Ndërsa jo pak herë janë ngritur pikëpyetje edhe mbi raportin mes aktivitetit financiar të deklaruar të kompanisë dhe numrit të madh të lejeve të ndërtimit që pretendohet se ajo ka siguruar leje ndërtimi në Tiranë, Durrës dhe në bashkitë bregdetare të jugut.
Nga Lalzi te kulla 65-katëshe
Emri i Beshirit dhe kompanive të lidhura me të shfaqet në projekte që kërkojnë kapitale të mëdha dhe që prekin disa prej zonave më të lakmuara të vendit.
Në nëntor të vitit 2025, “KLAR” u përfshi në një projekt për një godinë 65-katëshe mbi tokë në zonën e Bulevardit të Ri në Tiranë, me funksione banimi, hotelerie dhe njësi tregtare. Pra, nga njëra anë kemi një biznesmen që për vite ka qëndruar relativisht larg vëmendjes së publikut të gjerë. Nga ana tjetër kemi një emër që shfaqet gjithnjë e më shumë pas projekteve me dhjetëra kate, komplekseve turistike dhe sipërfaqeve të mëdha të tokës.
Beshiri shfaqet edhe te projektet e tjera të mëdha. Emri i kompanisë “KLAR” është shfaqur edhe në procedurën për projektin multifunksional pranë Pallatit të Kongreseve në Tiranë. Në fazën e parë të procedurës së zhvilluar nga Korporata Shqiptare e Investimeve, “KLAR” ishte mes operatorëve të përzgjedhur për të vijuar konkurrimin për një projekt me vlerë të konsiderueshme ndërtimore në zemër të kryeqytetit.
Një tjetër element që shton pikëpyetjet rreth këtij rrethi biznesi është edhe fakti se Shkëlqim Beshiri ka lidhje të afërta familjare me biznesmenin tjetër Ilir Shtufit. Ky i fundit një tjetër ndërtues i madh që, ashtu si Beshiri, është përfolur prej vitesh në media për lidhje të afërta me Shkëlzen Berishën. Shtufi është një prej përfituesve të mëdhenj të lejeve të ndërtimit në Tiranë, kompanitë e lidhura me të rezultojnë të jenë përfshirë në projekte me qindra mijëra metra katrorë ndërtim, ndërsa një prej investimeve më të njohura është kulla “Mali i Tiranës”.
Dhe këtu historia mbërrin përsëri te Gjiri i Lalëzit. Qeveria vendosi t’i vërë në dispozicion “Omnix Albania” tri pasuri shtetërore me një sipërfaqe të përgjithshme prej 90 030 metrash katrorë. Pra, me firmën e Ramës janë dhënë rreth 9 hektarë tokë në një prej zonave turistike më të lakmuara të bregdetit shqiptar, me tarifën simbolike 1 euro. Aksioneri më i madh i kompanisë përfituese është pikërisht “KLAR” e Shkëlqim Beshirit, ndërsa këtu çështja del nga kufijtë e një historie të zakonshme biznesi.
Sepse kemi një qeveri socialiste që vendos pasuri shtetërore në funksion të një investimi ku aksioneri kryesor është një biznesmen që prej vitesh është përfolur publikisht për marrëdhënie të afërta me djalin e Sali Berishës, kundërshtarit kryesor politik të Edi Ramës.
Rasti i Beshirit nuk provon në vetvete një marrëveshje Rama-Berisha. Por krijon një kontrast që kërkon përgjigje. Si arrin një biznesmen, i përfolur prej vitesh si njeri i afërt ekonomikisht me familjen e kundërshtarit më të madh të kryeministrit, të jetë pjesë e projekteve që marrin leje, status strategjik apo përdorimin e pasurive shtetërore gjatë qeverisjes së këtij të fundit?
Kështu, ndërsa Rama dhe Berisha vazhdojnë betejën e tyre të përditshme politike, biznesi ecën në një terren shumë më të qetë. Nga lejet e ndërtimit te kullat, nga projektet turistike te toka publike, biznesmeni i përfolur prej vitesh për lidhjet me Shkëlzen Berishën gjendet sot në qendër të një investimi që mban mbi vete firmën e qeverisë së Edi Ramës./VNA.al
