Aktivisti nga Britania, Bledar Meti deklaroi para mijëra protestuesve se nuk do të largohen nga sheshi derisa të bëjnë të mundur rrëzimin e kryeministrit Edi Rama, që e cilësoi si autoritar si edhe të qeverisë së tij të korruptuar.
Në fjalën e tij, ai theksoi nevojën e një qeverie tranzitore, për të depolitizuar administratën dhe mbajtjen e zgjedhjeve të lira dhe të ndershme.
“Do të jemi deri në rrëzimin e autoritarit Edi Rama. Ju jeni shpresa, ato që inspiruat këtë protestë dhe keni prekur zemrat e çdo shqiptari në diasporë. Më 22 qershor, ne e kthyem këtë protestë në kërkesa politike. Një dorëheqje e autoritarit dhe të qeverisë së tij të korruptuar. Së dyti, krijimi i një qeveritare tranzitore, një qeveri e shqiptarëve.
Kjo qeveri tranzitore duhet të mandatohet që t’i japë fund tranzicionit, duke hyrë në zgjedhje me lista të hapura dhe duke i dhënë fund sistemit ku partizanët e partiakëve numërojnë votat. Votat të numërohen me sistem rigoroz dhe elektronik që nuk bën deformimin e demokracisë. Kjo qeveri tranzitore duhet të bëjë depolitizimin e administratës pas 36 vitesh dhe t’i hapim fund patronazhismit. “, u shpreh ai.
Ai theksoi se do të përshkallëzojnë protestën, dhe se do të qëndrojnë në shesh derisa Edi Rama të largohet nga zyra e tij si kryeministër.
“Sonte ne nisim përshkallëzimin. Nuk do të ketë marshim, por qëndrim në këtë shesh. Anti shqiptari Edi Rama, ato 4 orë që do t’i kishim luks të shkonim te nënat tona, na i konsumoi në kufi se kishte dhënë urdhër të mos hyjmë në shesh. Iu themi familjarëve hajdeni në shesh. Rezistencë. Ta shporrim nga zyra autoritarin Edi Rama”, shtoi ai.
