Detaje të reja janë zbuluar nga operacioni “Lulet e së keqes” të zhvilluar në Greqi, ku u sekuestruan 84 kg kokainë ...
AKTUALITET
VIDEO/ Stuhia e fuqishme në Elbasan, dhjetëra banesa nën ujë dhe makina të dëmtuara
PiranjatPërditësimi i fundit 13 Shtator 2026, 10:30
Një stuhi me reshje shiu me intensitet të lartë goditi të shtunën qytetin e Elbasanit dhe zona të ndryshme të territorit të bashkisë, duke shkaktuar përmbytje, dëmtime të automjeteve, rrëzim pemësh dhe probleme në qarkullim. Sipas të dhënave të Bashkisë Elbasan, brenda vetëm 30 minutave u regjistruan rreth 60 milimetra reshje shiu, duke shkaktuar grumbullime të mëdha uji në disa pika.
Nga verifikimet paraprake, rreth 30 banesa dhe 20 bodrume u përmbytën. Ekipet e emergjencave dhe shërbimeve publike ndërhynë me pompa për largimin e ujit dhe normalizimin e situatës. Dëme të konsiderueshme janë shkaktuar edhe te automjetet e parkuara në ambiente nëntokësore, ku uji depërtoi si pasojë e reshjeve intensive.
Stuhia ka shkaktuar gjithashtu rrëzimin e 10 pemëve, të cilat u larguan nga rrugët nga ekipet e shërbimeve publike, duke mundësuar rikthimin e qarkullimit.
Problematikat nuk u kufizuan vetëm në qytet. Prurjet e krijuara nga reshjet shkaktuan dëmtime dhe vështirësi në disa rrugë të fshatrave dhe njësive administrative. Ekipet ndërhynë për pastrimin e akseve nga materialet e sjella nga uji dhe rikthimin e qarkullimit. Reshjet intensive prekën edhe zona të tjera të qarkut të Elbasanit, ku u raportuan probleme në segmente të rrugëve kombëtare dhe rurale, si dhe përmbytje të tokave bujqësore.
Fatmirësisht, pavarësisht intensitetit të reshjeve dhe dëmeve materiale, nuk është raportuar asnjë person i lënduar.
