Një konflikt mes disa personave është parandaluar të përshkallëzohet në një ngjarje me pasoja të rënda për jetën në Rrogozhinë, ndërsa policia ka arrestuar një 26-vjeçar dhe ka sekuestruar një armë zjarri tip kallashnikov.
Në kuadër të operacionit policor të koduar “Prevent 2”, shërbimet e Komisariatit të Policisë Kavajë, në bashkëpunim me Stacionin e Policisë Rrogozhinë, arrestuan në flagrancë shtetasit A. I., 26 vjeç, banues në Peqin, dhe O. T., 21 vjeç, banues në Peqin.
26-vjeçari A. I. akuzohet për veprat penale “Mbajtja pa leje dhe prodhimi i armëve, armëve shpërthyese dhe municionit” dhe “Kanosja”, ndërsa 21-vjeçari O. T. për veprën penale “Moskallëzimi i krimit”.
Ngjarja është regjistruar rreth orës 01:00 të datës 13 shtator 2026, kur policia ka marrë informacion se një person po kanoste me armë zjarri, për motive të dobëta, një 35-vjeçar.
Pas marrjes së informacionit, shërbimet e policisë kanë lokalizuar banesën ku ndodheshin dy të dyshuarit dhe kanë ushtruar kontroll në ambientet e saj.
Gjatë kontrollit, policia gjeti dhe sekuestroi një armë zjarri tip kallashnikov dhe municion luftarak, të cilat u morën në cilësinë e provës materiale.
Sipas policisë, A. I. kishte kanosur për vrasje shtetasin A. S., 35 vjeç, banues në Tiranë, i cili po shkonte në banesën e një 36-vjeçareje në Rrogozhinë, ku ndodheshin A. I. dhe O. T.
Ndërkohë, pas veprimeve procedurale dhe konsultimit me Prokurorin, ka nisur procedimi penal në gjendje të lirë për 36-vjeçaren, e cila akuzohet për “Moskallëzimin e krimit”. Sipas policisë, ajo nuk ndodhej në banesë në momentin kur ndodhi konflikti mes dy shtetasve.
Arma e zjarrit dhe municionet e sekuestruara do t’i nënshtrohen ekzaminimeve të mëtejshme kriminalistike.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.
