Festivali i Filmit Shqiptar mbylli në Tiranë edicionin e rikthimit, pas një mungese 14 vjeçare. Në një mbrëmje gala, u ndanë çmime për regjisorë, aktorë e krijues.
Kupa e Festivalit: “Një filxhan kafe dhe këpucë të reja veshur”
Kupa e Festivalit iu dha filmit “Një filxhan kafe dhe këpucë të reja veshur”, i regjisorit Gentian Koçi. Në një garën ku morën pjesë dhjetëra produksione shqiptare e bashkëprodhime, realizimi mori vlerësimin kryesor të jurisë.
Çmimet e aktrimit sollën emra të njohur të skenës dhe ekranit:
-Çmimi për Aktoren më të Mirë iu dha Adriana Matoshit, për interpretimin te “Luna Park”.
-Çmimi për Aktorin më të Mirë shkoi për Blerim Destanin, për rolin në filmin “Amsterdam Express”.
-Dritan Huqi e Vjollca Dedej u vlerësuan për kontributin në realizimin dhe promovimin e produksioneve kinematografike.
-Çmimi për Regjisorin më të mirë shkoi për Gjergj Xhuvanin, një prej emrave më të njohur të kinematografisë shqiptare, i ndarë nga jeta mbi 7 vjet më parë, më 14 gusht 2019.
-Një tjetër vlerësim i rëndësishëm ishte Çmimi i Karrierës, akorduar ikonës së kinematografisë dhe teatrit shqiptar, Tinka Kurti, në nderim të kontributit të jashtëzakonshëm ndër vite.
Çmimi Filmi i Parë: “Derë e hapur” – Florenc Papas
Çmimi i Muzikës më të Mirë: “Bolero në vilën e pleqve” – kompozitor Endri Sina
Çmimi për Skenarin më të Mirë: “Liqeni im” – Gjergj Xhuvani
Çmimi për Producentin më të Mirë: “Amsterdam Express” – producente Rozeta Feri
Çmimi për Fotografinë më të Mirë: “Derë e hapur” – Sevdije Kastrati
Nga data 3 e deri më 12 shtator, kryeqyteti u kthye në qendrën e kinematografisë shqiptare, me rreth 220 filma të prodhuar nga viti 2012 e të shfaqur te Universiteti i Arteve, Kinema “Agimi”, Piramida dhe “Film Zone” në sheshin “Nënë Tereza”.
Sipas organizatorëve, rreth 20 mijë shikues ndoqën filmat dhe aktivitetet e rastit.
Në këtë edicion, krijuesit u vlerësuan përmes Jurisë Zyrtare, Akademisë së Filmit dhe votës së publikut. Çdo regjisor konkurroi me një film të vetëm.
