Të shtëna me armë zjarri mbrëmë në Urakë të Matit. Persona ende të paidentifikuar qëlluan drejt një “Audi”, të parkuar në oborrin e një banese.
Makina është në pronësi të shtetases S.Ll. (bashkëshortja e shtetasit A.Ll.). Nga të shtënat pati vetëm dëme materiale. Për hetimin po bashkëpunohet edhe me blutë në Tiranë, Lezhë e Kukës.
Efektivët ngritën pika kontrolli. Rreth 2 kilometra larg vendit të të shtënave, në aksin Rrëshen-Burrel, policia gjeti të djegur një “Golf V”.
Dyshohet se mjeti mund të jetë përdorur nga autorët e sulmit, që qëlluan me mbi 30 plumba ndaj makinës së parkuar.
Brenda tij u gjetën dy kallashnikovë, të dëmtuar pjesërisht. Armët u sekuestruan si prova materiale.
Nga verifikimet, rezultoi se korrikun e vitit të kaluar, “Golf V” ishte denoncuar i vjedhur nga pronari i tij, banor i Përrenjasit.
