Kryeministri Edi Rama ka vijuar në Berat takimet në kuadër të konsultimit publik për reformën administrative-territoriale, duke diskutuar me përfaqësues të pushtetit vendor dhe qytetarë mbi ndryshimet e propozuara dhe ndikimin e tyre në territor.
Gjatë takimeve, Rama është ndalur te organizimi i njësive vendore dhe mënyra se si riorganizimi i tyre pritet të ndikojë në ofrimin e shërbimeve për qytetarët.
Kryeministri ka theksuar se ndryshimet e propozuara nuk synojnë të cenojnë shërbimet në Poliçan, Dimal apo në njësitë e tjera vendore. Sipas tij, qëllimi është krijimi i një administrimi më efikas, si dhe rritja e mundësive për zhvillim dhe investime në territor.
Përmes një reagimi në rrjetet sociale, Rama ka ndarë edhe përshtypjet nga takimi në Berat, duke vënë theksin te debati i zhvilluar me përfaqësuesit e zonave të prekura nga riorganizimi.
“Sot në Berat, ku kokëfortësia kolektive e Poliçanit dhe këmbëngulja e disa zonjave të mirëpërgatitura të Dimalit, i dhanë diskutimit shijen e një ballafaqimi të posaçëm”, shkruan Rama.
Konsultimet publike për reformën administrative-territoriale pritet të vijojnë edhe në zona të tjera të vendit, ndërsa diskutimi fokusohet te mënyra e organizimit të pushtetit vendor dhe përmirësimi i shërbimeve ndaj qytetarëve.