Kuvendi i Kosovës është konstituuar këtë të diel, pas përfundimit të procesit të zgjedhjes së nënkryetarëve. Në seancën konstituive morën pjesë deputetët e Lëvizjes Vetëvendosje, Lidhjes Demokratike të Kosovës, si dhe përfaqësuesit e komuniteteve jo-shumicë dhe atij serb. Ndërkohë, PDK-ja vendosi të mos marrë pjesë në seancë.
Procesi u zhbllokua pas ndryshimit të qëndrimit të Lëvizjes Vetëvendosje, e cila njoftoi se do të votonte kandidatët e propozuar nga partitë parlamentare, me qëllim përfundimin e konstituimit të Kuvendit.
Pak para nisjes së seancës, PDK-ja tërhoqi përkohësisht kandidaturën e Vlora Çitakut për postin e nënkryetares. Partia argumentoi se procedura e ndjekur bie ndesh me normat kushtetuese dhe ligjore, ndërsa paralajmëroi se do t’i drejtohet Gjykatës Kushtetuese.
Pas përfundimit të procedurës parlamentare, kryeministri në detyrë, Albin Kurti, deklaroi se nëse PDK-ja rikthehet në Kuvend dhe propozon sërish Vlora Çitakun, Vetëvendosje do ta votojë kandidaturën e saj për nënkryetare.
Seanca nisi me votimin e kandidatit të LDK-së, Kujtim Shala, i cili u zgjodh nënkryetar i Kuvendit me 75 vota pro.
Më pas u votuan kandidaturat e përfaqësuesve të komuniteteve. Pas tetë propozimeve të Listës Serbe që nuk morën votat e nevojshme, deputetja Tanja Vujoviç u zgjodh nënkryetare me 62 vota. Edhe Emilia Rexhepi, si përfaqësuese e komuniteteve jo-shumicë, mori votat e nevojshme për këtë detyrë.
Pas përfundimit të votimeve, kryetarja e Kuvendit, Albulena Haxhiu, deklaroi se e konsideron Kuvendin e Republikës së Kosovës të konstituuar.
Nga LDK-ja, Jehona Lushaku-Sadriu e cilësoi përfundimin e procesit si dëshmi se vullneti politik mund t’i japë fund bllokadës institucionale.
Ndërsa nga Vetëvendosje, Hekuran Murati tha se vota për kandidaten e Listës Serbe ishte e nevojshme për të përmbyllur procesin e konstituimit të Kuvendit.
Tashmë, PDK-ja dhe Aleanca pritet t’i drejtohen Gjykatës Kushtetuese, duke kërkuar interpretim mbi ligjshmërinë dhe kushtetutshmërinë e procedurës së ndjekur për konstituimin e Kuvendit.