Një 56-vjeçar është arrestuar në Vorë, pasi dyshohet se ka kërcënuar me jetë kushëririn e tij dhe familjarët e këtij të fundit, me qëllim për t’i marrë shumën prej 300 mijë eurosh.
Ngjarja u zbulua pas kallëzimit të bërë nga i afërmi i tij, i cili në portën e banesës, në fshatin Gërdec, ka gjetur një fishek dhe një letër me përmbajtje kërcënuese.
Në mesazhin e lënë pranë banesës kërkohej shuma prej 300 mijë eurosh, ndërsa në të kundërt kërcënohej jeta e tij dhe e familjarëve.
Pas kallëzimit, shërbimet e Komisariatit të Policisë Nr. 7 në Vorë nisën hetimet për identifikimin e autorit. Hetimet çuan në arrestimin në flagrancë të 56-vjeçarit Ardian Muka.
Gjatë kontrollit në banesën e tij, policia ka gjetur dhe sekuestruar municion luftarak, veshje që dyshohet se janë përdorur gjatë kryerjes së ngjarjes, si dhe një aparat celular.
Në përfundim të veprimeve hetimore, materialet procedurale i janë referuar Prokurorisë për veprat penale “Shtrëngimi me anë të kanosjes për dhënien e pasurisë” dhe “Mbajtja pa leje dhe prodhimi i armëve, shpërthyese dhe municionit”.
Hetimet vijojnë për dokumentimin e plotë të rrethanave të ngjarjes.