Shpërthim në një depo armësh në Bullgari

Një shpërthim ka shkaktuar zjarr në një depo armësh në Bullgarinë qendrore gjatë natës, kanë njoftuar të shtunën mediat dhe zyrtarët vendas.

Ky është zjarri i dytë në një objekt municionesh brenda pak javësh.

Nuk është raportuar për të lënduar nga shpërthimi i cili ka ndodhur pranë fshatit Tsareva Livada.

"Për momentin, zjarri ndodhet në territorin e bazës së magazinimit të fabrikës. Ai po përhapet nga njëra depo në tjetrën," u ka thënë gazetarëve në orët e para të së shtunës Kristina Sidorova, guvernatorja rajonale e Gabrovos.

Duke cituar një zyrtar të kompanisë EMCO, mediat vendase raportuan se zjarri kishte rënë në një objekt të menaxhuar nga kjo kompani, e cila kishte përjetuar një shpërthim në një objekt tjetër muajin e kaluar. 

EMCO drejtohet nga tregtari bullgar i armëve Emilian Gebrev. Prokurorët bullgarë pretendojnë se ai ka qenë shënjestër e sulmeve të mëparshme ndaj objekteve të tij nga agjentë rusë.

Edhe Botë 8 gus 2026 Droni hyn në hapësirën ajrore të Bullgarisë nga Rumania, shpërthen pranë një gazsjellësi

Në vitin 2024, Bullgaria ka lëshuar një urdhërarresti për gjashtë shtetas rusë, të akuzuar për përfshirje në shkatërrimin e depove të armëve të EMCO-s, ku ruheshin municione për eksport në Ukrainë dhe Gjeorgji midis viteve 2011 dhe 2020.

Në atë kohë, prokurorët deklaruan se mund të supozonin me arsye ekzistencën e lidhjeve midis shpërthimeve në Bullgari, një tentative për helmimin e Gebrevit në vitin 2015 dhe shpërthimeve në depot e municioneve në Republikën Çeke në vitin 2014.