Për të mbyllur një boshllëk ligjor, ku zyrtarët e lartë të Policisë së Shtetit mund t’i shpëtojnë vettingut përmes transferimeve, i është kërkuar Ministrisë së Drejtësisë ndërhyrje në ligjin e rivlerësimit.
Sipas një relacioni të përcjellë në ministri, i cili aktualisht po shqyrtohet nga Drejtoria e Kodifikimit, kërkohet që procesi i vettingut të mos ndërpritet më kur subjekti lëviz nga detyra.
Në draftin e propozuar thuhet qartë se , lëvizja paralele dhe ulja në detyrë e subjektit ndaj të cilit ka filluar procesi i rivlerësimit nuk përbën shkak për ndërprerjen e procesit.
Me ndryshimin e kërkuar, trupa e vlerësimit fuqizohet që të vazhdojë verifikimet deri në një vendim përfundimtar, i cili duhet të jetë vetëm dy llojesh ose konfirmim në detyrë ose përjashtim përfundimtar nga Policia e Shtetit.
Pavarësisht shortit, lëvizjet e drejtuesve që duhet të kontrolloheshin kanë qenë të shpeshta, çka ka sjellë ndërprerjen e procedurave.
Kujtojmë se filtrat e kontrollit të zyrtarëve të policisë janë të trefishtë, si kontrolli i pasurisë, kontrolli i figurës për lidhje me krimin e organizuar dhe vlerësimi i aftësive profesionale.
Sondazh
Lexo gjithashtu
