Ish-deputeti: Ngritja e Muzeut Hebraik në Vlorë po u bën nder shqiptarëve

13 Shtator 2026, 22:05, Politikë CNA

Ish-deputeti: Ngritja e Muzeut Hebraik në Vlorë po u bën nder

Ish-deputeti demokrat, Edmond Spaho, ka reaguar këtë të diel lidhur me diskutimet për ngritjen e një Muzeu Hebraik në qytetin e Vlorës.

Spaho shkruan në një postim në rrjetet e tij sociale se një nismë e tillë duhet parë pozitivisht, pasi në thelb nderon edhe më shumë vlonjatët dhe shqiptarët që janë përfshirë në një copëz historie të përbashkët me vende të tjera të Europës.

Sipas tij, kundërshtimet vijnë nga njerëz “të çmendur” dhe islamofilë të cilët harrojnë se Shqipëria nuk është Lindje e Mesme, rajon në të cilin Izraeli është e vetmja demokraci.

Postimi i plotë:

Ka kohë që debatohet për ngritjen e muzeut të hebrenjve në Vlorë.
Nuk kam dashur të shkruaj për këtë çështje, pasi mjaft të njohur të mi çuditërisht nuk e kanë parë pozitivisht këtë iniciativë dhe nuk kam dashur të debatoj me ta. Së fundmi, vë re që po kalohet një shkallë më tej; po organizohen protesta kundër ndërtimit të muzeut dhe iniciativa për ndërtimin e tij po konsiderohet çmenduri.

Në të vërtetë, të çmendur dhe islamofile duhet të quhen ata të cilët po i kundërvihen kësaj iniciative shumë të lavdërueshme, që i bën nder vlonjatëve dhe shqiptarëve. Vlora është një nga qytet-portet e Europës ku qindra vite më parë gjetën strehë çifutët, ashtu sikurse gjetën në Selanik, Spanjë apo vende të tjera. Nuk është turp për Vlorën, por është nder të ketë një muze të tillë, sepse ai do të pasqyrojë një histori të përbashkët të hebrenjve dhe shqiptarëve.

Në dallim nga shumë qytete të tjera në Europë ku u vendosën hebrenjtë, në Vlorë dhe Shqipëri ata jo vetëm u mirëpritën, por ndaj tyre nuk pati urrejtje, nuk u organizua asnjë pogrom dhe bashkëjetuan në paqe si të ishin e njëjta kombësi. Ne mburremi që në Shqipëri pas Luftës së Dytë Botërore pati më shumë hebrenj se para luftës, dhe Vlora ka kontributin e saj të qenësishëm.

Nuk i kuptoj ata që ngrihen kundër ndërtimit të muzeut të hebrenjve. Çfarë pune u prish, ku bie ndesh me vlerat e shoqërisë vlonjate apo shqiptare, çfarë plagësh hap ky muze? Ne na mungojnë shumë muze, por ky nuk është argument që nuk duhet të kemi një muze hebre, të cilin vende të tjera pa një histori të tillë do të vraponin ta rrëmbenin. Nuk gjej asgjë racionale përveçse ndërhyrje ideologjike të islamit politik me bazë jashtë vendit tonë.

Të turpshme janë zërat që përhapin se Izraeli ka blerë Vlorën, se në Vlorë do të vendosen kolonë çifutë dhe marrëzira të tjera. Çfarë flisni morë të mjerë? Izraelin e respekton Amerika dhe e konsideron aleat të madh, kurse ne shqipot e vitit 2026 paskemi luksin t'i tregojmë derën!!! Po me kë të lidhemi, me Palestinën, me Katarin, me Iranin, me Libanin e Sirinë?

Shqipëria nuk është Lindje e Mesme. Ne kemi nevojë për sa më shumë aleatë si SHBA, BE, Izrael, Turqi dhe vende të tjera të cilat, si vend i vogël që jemi, të na gjenden në ditë të vështira. Bota nuk është vetëm paqe. Ajo është më shumë luftë sesa paqe dhe në të tilla raste duhet të kesh aleatë që i ka provuar historia. Asgjë nuk na lidh me Lindjen e Mesme dhe me asnjë shtet të saj; nga ata as kemi parë dhe as do të shohim ndonjë të mirë përveç shqetësimeve. Izraeli është e vetmja demokraci në atë rajon dhe ne duhet të jemi krah demokracisë dhe jo krah atyre që kërkojnë të zhdukin një shtet që të ngrihet tjetri./CNA