Më 8 shtator, i dërguari special i Presidentit të SHBA-ve për Partneritetet Globale, Paolo Zampolli zhvilloi një takim të papritur me presidentin e Federatës Shqiptare të Futbollit, Armando Duka.
Dy burrat pozuan duke buzëqeshur përballë pllakatës në hyrje të Federatës, e njohur si “Shtëpia e Futbollit”, ndërkohë që Zampolli veçoi me këmbëngulje me gishtin e tij tregues një emër mbi pllakë: Gianni Infantino, President i FIFA-s.
Edhe pse takimi u prezantua zyrtarisht nën petkun e “diplomacisë sportive”, BIRN mësoi se pas tij fshihet një mision lobimi.
Përtej rolit si i dërguar i Shtëpisë së Bardhë, Zampolli është një avokat i hapur dhe i zjarrtë i Gianni Infantinos dhe gjatë vizitës së tij në Tiranë, ai kërkoi mbështetje për rizgjedhjen e tij për një mandat tjetër 4-vjeçar në krye të FIFA-s.
Vizita e Zampollit në Tiranë u zhvillua në një moment delikat për kreun e FIFA-s, i cili po përballet me tërheqje të njëpasnjëshme të mbështetjes nga federatat europiane të futbollit për shkak të një propozimi të dështuar për shitjen e të drejtave të Kupës së Botës tek një konsorcium privat.
Federata Shqiptare e Futbollit e ka tërhequr gjithashtu zyrtarisht në gusht mbështetjen e dhënë më parë për Infantinon për një mandat të ri në krye të FIFA-s.
Përfshirja e një të dërguari të Shtëpisë së Bardhë për të lobuar për kreun e FIFA-s e bën këtë vizitë kontroverse, pasi rrezikon të shkelë një nga parimet më strikte të statutit të futbollit botëror, ndalimin e ndërhyrjes së politikës shtetërore në pavarësinë e federatave.
Vetë Zampolli e përshkroi vizitën e tij në zyrat e FSHF-së me fjalët: “Diplomacia sportive ‘America First’ [Amerika e Para] në veprim”.
I pranishëm në takimin mes Zampollit dhe Dukës, Ilir Kulla, një ish-këshilltar i lartë shtetëror dhe ekspert i sigurisë, pranoi se mandati i Infantinos kishte qenë pjesë e takimit, por shtoi se për këtë duhej të fliste kreu i FSHF-së.
“Ka një të vërtetë, por besoj që i takon Dukës,” tha Kulla përmes një mesazhi.
“Infantinon e kanë mik të përbashkët dhe është mik i Trump-it,” shtoi më tej ai.
E pyetur për lobimin e Zampollit në Shqipëri, FIFA mohoi përmes një zëdhënësi çdo përfshirje të mundshme të kreut të saj.
“Presidenti i FIFA-s nuk ka dijeni për këtë çështje dhe nuk i ka dhënë udhëzime askujt,” tha zëdhënësi.
Kreu i FSHF-së, Armando Duka ishte i paarritshëm për koment, ndërkohë që një zëdhënës i FSHF-së i tha BIRN-it se përsa i përket Infantinos, institucioni shqiptar mban të njëjtin qëndrim si qeveria europiane e futbollit: “Ne kemi qëndrim të unifikuar me UEFA-n.”
Mbështetje për Infantinon
Zampolli është një biznesmen italiano-amerikan, i njohur gjerësisht si mik i afërt i presidentit të Shteteve të Bashkuara, Donald Trump dhe si njeriu që i ka prezantuar këtij të fundit bashkëshorten e tij, Melania.
Megjithatë, profili i tij publik ka pasur edhe hije dyshimi, teksa emri i tij është lakuar në media për shkak të përmendjes në rrethin e kontakteve të miliarderit të akuzuar për abuzime seksuale me të mitur, Jeffrey Epstein.
Përtej rolit si i dërguar i Shtëpisë së Bardhë, Zampolli është pozicionuar hapur përkrah Infantinos. Në një artikull të gjatë të publikuar së fundmi, “Faji i vërtetë i Gianni Infantinos: Hapja e futbollit ndaj botës”, Zampolli e mbron Infantinon si një kampion të vendeve të vogla që po lufton monopolin europian.
Në këtë material, ai argumenton se fushata kundër Infantinos është “shkëputur nga perspektiva dhe faktet” dhe thekson se faji i vërtetë i presidentit të FIFA-s është sfidimi i një ekonomie globale ku, Europa gjeneron rreth 70 për qind të të ardhurave dhe kërkon ta kthejë këtë sukses në një “mur që mbron privilegjin nga pjesa tjetër e botës”.
Zampolli është bërë edhe më herët lajm ndërkombëtar në lidhje me futbollin.
Para fillimit të Kupës së Botës në SHBA, Meksikë dhe Kanada që përfundoi në korrik, ai propozoi që Irani, me të cilin SHBA-të ishin në konflikt, të zëvendësohej në këtë garë nga Italia. Por propozimi i tij u përqesh dhe u rrëzua, pasi nuk mbështetej në asnjë prej rregullave të lojës.
Përplasja mes UEFA-s dhe Infantinos
Përpjekja e të dërguarit të Trump-it për të siguruar mbështetje për kandidimin e Infantinos vjen si pasojë e një krisjeje të fortë mes UEFA-s dhe FIFA-s. Krisja erdhi pas propozimit të dështuar të Infantinos për strukturën e re të investimeve, e cila konsistonte në një plan për t’i shitur të drejtat e turneve të FIFA-s, përfshirë Kupën e Botës, te një konsorcium privat investitorësh në këmbim të miliarda dollarëve investime – një lëvizje që u kundërshtua ashpër nga komuniteti i futbollit për mungesë konsultimesh paraprake, duke e detyruar kreun e FIFA-s ta tërhiqte atë.
Pas kësaj përplasjeje, që erdhi menjëherë pas përfundimit të Kupës së Botës, UEFA dhe një sërë federatash pjesë e saj, përfshirë Gjermaninë, Anglinë, Francën dhe një sërë vendesh të tjera, tërhoqën mbështetjen për Infantinon.
FSHF iu bashkua këtij grupi më 6 gusht 2026, kur Presidenti i FSHF-së, Armand Duka, i dërgoi një letër zyrtare Sekretarit të Përgjithshëm të FIFA-s, Mattias Grafström, për t’i komunikuar tërheqjen e mbështetjes. Përmes këtij dokumenti, FSHF njoftonte revokimin e mbështetjes së dhënë më herët, konkretisht më 20 maj 2026, për kandidaturën e Gianni Infantinos për një mandat të ri katërvjeçar në krye të institucionit.
Në letër theksohej se vendimi ishte marrë pas “konsultimeve të mëtejshme të brendshme dhe një shqyrtimi të kujdesshëm”. Ndonëse FSHF përdori një gjuhë diplomatike në shkresë, tërheqja vjen në vijim të qëndrimeve të ashpra të federatave europiane lidhur me proceset e qeverisjes së FIFA-s.
Në rrugë zyrtare, FSHF zgjodhi ta mbajë çështjen e lobimit jashtë vëmendjes së publikut, duke u fokusuar te njoftimet për diplomacinë sportive. UEFA refuzoi të përgjigjej, duke sugjeruar që pyetjet duhej t’i drejtoheshin Tiranës zyrtare.
Axhenda e ngjeshur dhe “Shteti Bektashi”
Gjatë vizitës në Tiranë, Zampolli nuk u mjaftua vetëm me futbollin, por zhvilloi një axhendë të ngjeshur takimesh me përfaqësues të institucioneve shtetërore, klerikë dhe drejtues të sportit.
Në daljet e tij publike, ai u përfshi edhe në debatin më të fundit gjeopolitik dhe fetar në vend, lidhur me çështjen tejet kontroverse të krijimit të “Shtetit Bektashi” brenda kufijve të Tiranës.
“Mendoj se është një projekt i shkëlqyer. E kam dëgjuar kryeministrin të flasë, dëgjova shenjtërinë e tij [kreun e bektashinjve] dhe njerëzit tuaj vendosin ose do të vendosin. Mendoj se komuniteti ndërkombëtar respekton vendimin e popullit shqiptar,” tha Zampolli për gazetarët pas takimit.
Kjo u pasua nga takime të tjera, duke përfshirë kreun e Komitetit Olimpik Kombëtar Shqiptar, Fidel Ylli, Ministren e Ekonomisë dhe Inovacionit si dhe zv. ministrin për Sportin me një axhendë zyrtarisht të fokusuar te partneritetet globale, investimet dhe diplomacia amerikane.
