Nis viti i ri shkollor, 340 mijë nxënës ulen në bankat e shkollës

Sot hapen dyert e shkollave në të gjithë Shqipërinë, duke shënuar nisjen e vitit të ri mësimor 2026–2027. Mbi 340 mijë nxënës rikthehen në bankat e shkollës, ndërsa rreth 25 mijë fëmijë u bashkohen për herë të parë komuniteteve shkollore.

Viti i ri akademik sjell një sërë ndryshimesh në sistemin parauniversitar, të shoqëruara me investime në infrastrukturë, siguri dhe mbështetjen psiko-sociale të nxënësve.

Një prej risive të këtij viti lidhet me tekstet shkollore. Në të gjitha institucionet arsimore janë shpërndarë tekstet për vitin e ri, ndërsa nxënësit nga klasa e parë deri në të pestën do të kenë në dispozicion tekste të reja dhe falas.

Në planin e infrastrukturës, 53 shkolla të reja ose të rehabilituara do të presin nxënësit këtë vit. Krahas tyre, janë miratuar edhe 39 projekte të tjera që parashikojnë ndërhyrje dhe rikonstruksione në institucione arsimore në të gjithë vendin.

Siguria në ambientet shkollore mbetet një tjetër prioritet. Mbi 400 oficerë sigurie do të jenë në shërbim të nxënësve gjatë vitit të ri mësimor, duke zbatuar protokolle dhe standarde të përditësuara.

Vëmendje e veçantë i kushtohet edhe mirëqenies emocionale dhe sociale të fëmijëve. Rreth 900 psikologë dhe punonjës socialë do të angazhohen në shkollat e vendit për të ofruar mbështetje dhe për t’iu përgjigjur problematikave me të cilat mund të përballen nxënësit.

Në Tiranë, 20 shkolla do të përfshihen në projektin pilot “Smart City”, ku siguria do të forcohet përmes përdorimit të kamerave inteligjente.

Një tjetër risi është zgjerimi i programit “Pas shkolle”, i cili këtë vit do të zbatohet për herë të parë në 408 shkolla në të gjithë vendin. Programi synon t’u ofrojë nxënësve hapësira ku mund të qëndrojnë, mësojnë dhe zhvillojnë aftësitë e tyre edhe pas përfundimit të orarit mësimor.

Aktivitetet do të përfshijnë ndihmën për detyrat e shtëpisë, muzikën, teatrin, kërcimin, zejet dhe artet pamore. Përmes kësaj nisme synohet që koha pas mësimit të shndërrohet në një mundësi për zhvillimin e talenteve, aftësive personale dhe socializimit të fëmijëve.

Me këto ndryshime, viti shkollor 2026–2027 nis me fokus te modernizimi i mjediseve arsimore, rritja e sigurisë dhe krijimi i më shumë mundësive për zhvillimin akademik, social dhe krijues të nxënësve.