Kushner: SHBA përdori izolimin e Izraelit pas sulmit në Doha për të siguruar marrëveshjen për Gazën

I dërguari dhe dhëndri i Presidentit të SHBA-së Donald Trump, Jared Kushner, tha se Uashingtoni përdori presionin ndërkombëtar mbi Izraelin pas sulmit ajror të shtatorit 2025 në Doha të Katarit, duke synuar udhëheqësit e Hamasit për të ndihmuar në shtytjen e vendit drejt një armëpushimi në Gaza dhe një marrëveshjeje për lirimin e pengjeve.

“Izraeli kreu sulmin në Doha, i cili ishte një gjë e tmerrshme”, tha Kushner. “Ishte i pasuksesshëm si operacion ushtarak dhe kjo çoi në izolimin global të Izraelit.”

Sipas Kushner, Shtetet e Bashkuara e shfrytëzuan atë presion diplomatik për të çuar përpara një marrëveshje që kishte qenë në përgatitje prej muajsh.

“Dhe ne e përdorëm atë dinamikë për t’i shtyrë ata drejt një marrëveshjeje me të cilën tani, sot, janë mjaft të kënaqur”, tha ai.

Sulmi ajror i 9 shtatorit 2025 në një kompleks banimi në lagjen Leqtaifiya të Dohas kishte në shënjestër udhëheqës të lartë të Hamasit, të cilët po takoheshin për të diskutuar një propozim armëpushimi të mbështetur nga SHBA-të për konfliktin në Gaza.

Udhëheqësit kryesorë i mbijetuan sulmit, duke e bërë atë një përpjekje të dështuar për vrasje të synuar.

Pesë anëtarë dhe ndihmës të Hamasit vdiqën, përfshirë djalin e udhëheqësit të lartë të Hamasit, Khalil al-Hayya. Një oficer 22-vjeçar i Forcës së Sigurisë së Brendshme të Katarit u vra gjithashtu.

Kushner pranoi se zyrtarët izraelitë fillimisht nuk ndiheshin rehat me disa nga masat që Uashingtoni po i nxiste ata të pranonin.

«Në atë kohë, ata ndiheshin paksa në siklet me atë që po i shtynim ne të bënin», tha ai.

Megjithatë, ai argumentoi se rezultati përfundimtar i sjell dobi si Izraelit ashtu edhe Gazës.

“Por në fund të fundit, doli të ishte shumë mirë për ta dhe për popullin e Gazës”, tha Kushner./ AA.