Dy persona janë arrestuar nga autoritetet greke pas një incidenti me të shtëna armësh pranë një beach bar-i në Anavisos, në orët e para të së dielës. Ndërkohë, policia vijon kërkimet për të dënuarin shqiptar Alket Rizai, i cili ndodhej jashtë burgut me leje, raporton media greke “Protothema”.
Në pranga ka rënë pronari 41-vjeçar i beach bar-it, i cili akuzohet për dëshmi të rreme, strehim të një personi të përfshirë në vepër penale, pengim të drejtësisë, si dhe nxitje morale në mbajtjen dhe përdorimin e paligjshëm të armëve.
E arrestuar është edhe bashkëshortja e tij 39-vjeçare. Ajo akuzohet për dëshmi të rreme dhe nxitje morale në mbajtjen dhe përdorimin e paligjshëm të armëve.
Si nisi konflikti
Nga përplasja mbetën të plagosur dy persona, një 20-vjeçar grek dhe një 41-vjeçar me origjinë pakistaneze. Hetuesit po përpiqen të përcaktojnë dinamikën e plotë të ngjarjes, përfshirë se kush nxori armën i pari, kush qëlloi dhe nëse pati shkëmbim zjarri.
Sipas të dhënave paraprake, konflikti nisi pasi muzika në lokal u ndërpre për shkak të orarit të vonë. Rizai dhe personat që e shoqëronin ndodheshin fillimisht brenda beach bar-it, por më pas dolën jashtë.
Rizai dyshohet se shkoi drejt automjetit të tij së bashku me disa persona dhe vendosi muzikë me volum të lartë. Pronari i lokalit doli jashtë dhe i bëri vërejtje, çka solli një debat të ashpër.
Sipas informacioneve të hetimit, situata u përshkallëzua dhe Rizai dyshohet se nxori një armë. Autoritetet po shqyrtojnë mundësinë që ai të ketë qëlluar, ndoshta në ajër, por ende nuk është përcaktuar me saktësi se si kanë ndodhur të shtënat.
Në konflikt dyshohet se u përfshi më pas edhe një shtetas afgan, i cili mendohet se kishte lidhje me sigurinë e beach bar-it. Sipas hetuesve, ai është thirrur për të ndërhyrë pasi situata ishte përshkallëzuar dhe dyshohet se ka qëlluar në drejtim të Rizait.
Policia vijon kërkimet për Rizain
Në vendngjarje janë gjetur gëzhoja dhe gjurmë gjaku, të cilat po analizohen nga laboratorët kriminalistikë. Autoritetet po marrin dëshmi nga personat që ndodheshin në zonë dhe po shqyrtojnë pamjet e kamerave të sigurisë për të rindërtuar ngjarjen.
Rizai ndodhej jashtë burgut të Domokosit me leje dhe duhej të kthehej në institucionin e vuajtjes së dënimit mëngjesin e së hënës.
Pas incidentit, autoritetet greke kanë nisur kërkimet për gjetjen e tij, ndërsa po hetojnë edhe lëvizjet e tij pas përplasjes me armë.
