Kryeministri i Kosovës, Albin Kurti në mbledhjen e parë të Qeverisë së re u ka bërë thirrje partive politike dhe deputetëve për zgjidhjen e çështjes së presidentit. Ka thënë se do të ishte e pafalshme shkuarja e serishme në zgjedhje.
Sipas Kurtit, një diskutim i hapur dhe i sinqertë mund t’i sjellë vendit president të ri.
“Përpara kemi çështjen e presidentit dhe një marrëveshje politike mes VV-së dhe LDK-së. Para nesh është sfida me qëndrimin e shprehur nga disa deputetë të LDK-së që nuk duan ta zbatojnë marrëveshjen e arritur me mund e përkushtim.
Jemi kaq afër zgjidhjes së presidentit saqë do të ishte e pafalshme të shkojmë në zgjedhje serish për të ardhur prapën në të njëjtën pikë. Ju bëj thirrje liderëve politikë, deputetëve le ta zgjidhin çështjen e presidentit. Le t’i japim vendit tonë institucionet në përputhje me vullnetin qytetar dhe le të ecim përpara”, ka thënë ai.
Kurti ka thënë se gjetja e kompromisit politik është e mundur dhe sjell rezultat. Sipas tij dëshmi e kësaj është konstituimi i Kuvendit.
