Gazetari i News24, Osman Stafa, është kërcënuar me vdekje përmes një mesazhi të dërguar në llogarinë e tij në Facebook. Në mesazhin kërcënues, ndër të tjera, shkruhet: “mbaje mend do të vras” dhe “këtë ta garantoj”.
Sipas dëshmisë së gazetarit, kërcënimi dyshohet se lidhet me një material filmik të realizuar dhe publikuar prej tij gjatë protestës së 8 shtatorit pranë Parlamentit.
Në këtë material, Stafa kishte dokumentuar veprimet e disa personave civilë gjatë ndalimit dhe arrestimit të një protestuesi.
Asociacioni i Gazetarëve të Shqipërisë (AGSH) ka dënuar me forcë kërcënimin dhe ka shprehur shqetësimin ethellë për sigurinë e gazetarit.
AGSH e konsideron kërcënimin me vdekje, veçanërisht kur lidhet me ushtrimin e detyrës dhe publikimin e materialeve me interes publik, si një sulm të rëndë ndaj sigurisë së gazetarit, lirisë së medias dhe të drejtës së publikut për t’u informuar.
Shoqata i ka kërkuar Policisë së Shtetit dhe organeve të drejtësisë të veprojnë me urgjencë për identifikimin e personit ose personave që qëndrojnë pas llogarisë nga e cila është dërguar kërcënimi.
