Autoritetet policore dhe doganore sekuestruan të hënën 41.35 kilogramë kokainë në një kontejner që vinte nga Brazili, duke shënuar rastin e tretë të goditjes së trafikut të drogës në portin më të madh të vendit brenda një muaji.
Sipas njoftimit zyrtar të Policisë së Shtetit, lënda narkotike u zbulua gjatë operacionit të koduar “Anchor 3”. Kontejneri, i cili sipas dokumentacionit shoqërues transportonte mish pule, u mbajt nën vëzhgim dhe iu nënshtrua një kontrolli të imtësishëm nga Sektori për Hetimin e Narkotikëve, në bashkëpunim me Policinë Kufitare dhe strukturat doganore.
“Gjatë kontrollit të kontejnerit, në kapakët e jashtëm të tij u konstatuan 37 paketime me lëndë të dyshuar narkotike kokainë”, thuhet në njoftim. Në videon që shoqëron njoftimin për media, droga duket e paketuar në pako me mbështjellje plastike me ngjyra të ndezura.
Autoritetet përllogarisin se sasia e sekuestruar kap një vlerë tregu prej rreth 2 milionë eurosh.
Në njoftimin e policisë nuk raportohet për persona të arrestuar deri në këtë fazë të operacionit dhe as nuk bëhet i ditur emri i kompanisë që po importonte mishin e pulës.
