Thesari i Tiranës ka zhbllokuar pagat e Gjykatës së Posaçme, pas argumentit se po zbatohet një vendim i detyrueshëm gjykate, i vendosur si masë sigurie.
Sipas burimeve për WebLajm.com, pas 14 ditësh bllokim, pagat tashmë janë llogaritur me vlerat e reja, ndërsa pritet që pagesat e stafit të reflektohen zyrtarisht në llogaritë bankare ditën e martë, më 15 shtator.
Megjithatë, deri në këto momente nuk ka ende një konfirmim zyrtar për zhbllokimin e plotë të fondeve.
Burime pranë çështjes sqarojnë se fondet nuk do të zhbllokohen në mënyrë të njëtrajtshme për të gjithë magjistratët.
Sipas tyre, përfitimi do të vlejë vetëm për ata magjistratë që kanë arritur të sigurojnë një masë sigurie nga gjykata administrative.
Çështja lidhet me pagat e magjistratëve dhe zbatimin e vendimeve gjyqësore përkatëse, në një situatë ku fondet e Gjykatës së Posaçme kanë qenë të bllokuara prej rreth dy javësh.
