Kokainë me vlerë 2 mln euro brenda kontejnerit me mish nga Brazili
Antidroga e Durrësit ka zbuluar brenda një kontejneri me mish nga Brazili afro 42 kg kokainë, të ndarë në disa pako.
Lënda narkotike është e cilësisë së parë dhe e pastër, dhe në treg kap vlerën e rreth 2 mln eurove.
Në Portin e Durrësit, policia ka pasur informacion për një sasi të madhe kokaine që ishte nisur drejt vendit tonë, ku u kryen kontrolle të imtësishme në një kontejner me origjinë nga Brazili, i cili, sipas dokumentacionit, transportonte mish pule. Kontejneri ishte porositur nga kompania AMG SH.P.K. Përfaqësuesi ligjor i kësaj kompanie është thirrur në Drejtorinë e Policisë në Durrës, ku është pyetur në lidhje me porositjen e mishit.
Gjatë kontrollit të kontejnerit, në kapakët e jashtëm të tij u konstatuan 37 paketime me kokainë të pastër.
Mishi është marrë nga Brazili, ndërkohë që kontejneri ka ndaluar edhe në Greqi përpara se të vinte në Shqipëri. Ende grupi hetimor e ka të paqartë se në cilin vend është futur lënda narkotike.
Hetuesit vijojnë hetimet për zbulimin e porositësve të lëndës narkotike, të cilët duket se kanë shfrytëzuar kontejnerët e mishit për ta sjellë në Shqipëri.
Kompania AMG SH.P.K. është e lidhur me kompaninë tjetër Dimal.
Kujtojmë se përpara pak kohësh, Dimal importoi nga Brazili 7.8 ton mish me salmonelë. Një këmbanë alarmi që shkundi AKU-në, pasi sasia e madhe u zbulua pasi kompania Dimal e kishte hedhur në treg dhe rrezikonte jetën dhe shëndetin e shqiptarëve.
/vizionplus.tv
