Nesër kreu i "5D" pret lirinë, por a do të mbrojë Gjykata e Lartë zyrtarisht korrupsionin?!

14 Shtator 2026, 15:15, Aktualitet CNA

Nesër kreu i "5D" pret lirinë, por a do të mbrojë

Nënkryetari i Partisë Demokratike, Belind Këlliçi, ka mbajtur një qëndrim në lidhje me seancën në Gjykatën e Lartë për kryebashkiakun e arrestuar të Tiranës, Erion Veliaj, që pritet të mbahet nesër.

Këlliçi thekson se Veliaj prej kohësh me skema të ndryshme ka shtyrë pafundësisht gjyqet në GJKKO. Ai nënvizon se nëse nesër lë qelinë, Veliaj do të ketë zyrën e kryetarit të Bashkisë së Tiranës dhe pushtetin që buron prej aty në dispozicion të interesit personal, në shërbim të hallit të tij duke e vënë përballë GJKKO e SPAK.

Sipas tij, nëse Gjykata e Lartë e liron nesër Veliajn, drejtësia dhe beteja ndaj korrupsionit merr një goditje të pashembullt. Ai thotë se dëmi do të jetë i parikuperueshëm, pasi do të kemi rikonfirmim të pandëshkueshmërisë, të kontrollit politik mbi gjykatën më të rëndësishme në vend.

Këlliçi deklaron se nëse Gjykata e Lartë liron Veliajn do të japë një vendim që favorizon abuzimin me detyrën, që favorizon kryerjen e veprave të rënda penale nga korrupsioni te pastrimi i parave të pista.

“Nesër kreu i 5D pret lirinë, por a do të mbrojë Gjykata e Lartë zyrtarisht korrupsionin?!

Me 13 akuza të rënda për korrupsion, fshehje pasurie, pastrim parash, shpërdorim detyre, etj, Erjon Veliaj pret nesër të marrë lirinë nga Gjykata e Lartë.

Ai ka bërë gjithçka deri më tani për të krijuar rrethanat që të lërë qelinë e të rikthehet në zyrë. Duke krijuar krizë në bashki, në menaxhimin e shërbimeve kryesore të qytetit, duke shkarkuar ata që nuk i binden, duke lobuar me qindra mijra dollarë me zyra të shtrenja avokatie e deri me shkrime në mediat amerikane, Veliaj ka ngritur një skemë presioni për të dalë nga qelia.

Nga ana tjetër, ka në favor Sadushin e partisë, Kryetarin e Gjykatës së Lartë i cili pak kohë më parë ndryshoi praktikën gjyqësore me një vendim unifikues ku u shpreh se burgu duhet të jetë masa e fundit për të korruptuarit.

Edi Rama është shprehur së fundmi në favor të lirimit të Veliajt, duke thënë se Bashkia më e madhe është pa zot. Të mos përmendim këtu vendimin e Gjykatës Kushtetuese që e la në detyrë, pra i la në dorë kartën kryesore që ai po përdor në këtë proces.

Arsyeja pse Erion Veliaj kërkon të lërë qelinë është e lidhur drejtpërdrejtë me gjyqin që ndërkohë ka nisur, por ai e zvarrit me mungesa e me justifikime banale.

Nëse nesër lë qelinë, Veliaj do të ketë zyrën e Kryetarit të Bashkisë së Tiranës dhe pushtetin që buron prej aty në dispozicion të interesit personal, në shërbim të hallit të tij duke e vënë përballë GJKKO e SPAK.

Nëse Gjykata e Lartë e liron nesër Veliajn, drejtësia dhe beteja ndaj korrupsionit merr një goditje të pashembullt. Dëmi do të jetë i parikuperueshëm, pasi do të kemi rikonfimim të pandëshkueshmërisë, të kontrollit politik mbi Gjykatën më të rëndësishme në vend.

Gjykata e Lartë, nëse liron Veliajn do të japë një vendim që favorizon abuzimin me detyrën, që favorizon kryerjen e veprave të rënda penale nga korrupsioni tek pastrimi i parave të pisëta. Nëse kjo ndodh, nga nesër Gjykata e Lartë kthehet zyrtarisht në notere të korrupsionit qeveritar!”, shkruan Këlliçi./ CNA