Kryeministri i Kosovës Albin Kurti u ka bërë thirrje deputetëve dhe drejtuesve politikë që të përmbyllin procesin p&eu...
AKTUALITET
SafeJournalists: Kërcënimi me vdekje ndaj gazetarit Osman Stafa në Shqipëri duhet të hetohet urgjentisht
PiranjatPërditësimi i fundit 14 Shtator 2026, 15:45
Rrjeti SafeJournalists dënon fuqishëm kërcënimin e drejtpërdrejtë me vdekje ndaj gazetarit të News24, Osman Stafa, dhe u bën thirrje autoriteteve shqiptare të identifikojnë urgjentisht personin përgjegjës, të përcaktojnë nëse kërcënimi lidhet me punën e tij gazetareske dhe të marrin të gjitha masat e nevojshme për garantimin e sigurisë së tij. Më 14 shtator 2026, Stafa paraqiti kallëzim penal pranë Drejtorisë për Hetimin e Krimeve Kibernetike të Policisë së Shtetit, pasi kishte marrë përmes Facebook Messenger një kërcënim të drejtpërdrejtë me vdekje. Në mesazh kërcënohej se do të gjendej dhe vritej, ndërsa bëhej referencë edhe ndaj pamjeve që ai kishte publikuar së fundmi.
Sipas deklarimit të Stafës në polici, më 8 shtator ai kishte filmuar dhe publikuar pamje nga një protestë pranë Kuvendit të Shqipërisë, ku shfaqeshin katër persona me veshje civile gjatë ndalimit të një protestuesi. Nisur nga përmbajtja dhe koha e dërgimit të mesazhit kërcënues, Stafa vlerëson se kërcënimi mund të lidhet me publikimin e këtyre pamjeve.
Rrjeti SafeJournalists i bën thirrje Policisë së Shtetit dhe organeve kompetente të prokurorisë të zhvillojnë një hetim të shpejtë, të plotë dhe efektiv. Provat digjitale përkatëse duhet të sigurohen pa vonesë, duhet të identifikohet personi që qëndron pas llogarisë dhe të hetohet plotësisht çdo lidhje e mundshme ndërmjet kërcënimit dhe punës gazetareske të Stafës. Autoritetet duhet gjithashtu të vlerësojnë nivelin e rrezikut ndaj gazetarit dhe, kur është e nevojshme, të marrin masat e duhura për mbrojtjen e tij. Rrjeti kujton se ky nuk është incidenti i parë serioz që përfshin Osman Stafën. Në dhjetor 2025, SafeJournalists dënoi një mesazh kërcënues të dërguar ndaj tij pas raportimeve mbi kushtet në Spitalin Onkologjik në Tiranë dhe kërkoi një hetim të shpejtë dhe efektiv. Në qershor 2026, Rrjeti reagoi gjithashtu ndaj një incidenti të raportuar me fyerje verbale dhe intimidim fizik ndaj Stafës pas një proteste qytetare në Tiranë.
Përsëritja e kërcënimeve dhe rasteve të intimidimit të raportuara nga Osman Stafa e bën edhe më urgjente nevojën për një reagim institucional të besueshëm dhe efektiv. Kërcënimi i fundit duhet të hetohet bazuar në faktet konkrete të rastit, ndërsa incidentet e mëparshme duhet të merren në konsideratë gjatë vlerësimit të nivelit të rrezikut dhe të masave mbrojtëse që mund të nevojiten.
Kërcënimet me vdekje ndaj gazetarëve mund të kenë pasoja serioze dekurajuese mbi raportimin dhe ushtrimin e rolit mbikëqyrës të medias në interes të publikut. Gazetarët duhet të jenë në gjendje të raportojnë nga protestat, të dokumentojnë veprimet e autoriteteve publike dhe aktorëve të tjerë dhe të raportojnë për çështje me interes publik pa frikën e kërcënimeve, intimidimit apo hakmarrjes.
Rrjeti SafeJournalists shpreh solidaritet të plotë me Osman Stafën dhe do të vazhdojë ta ndjekë nga afër rastin, përfshirë reagimin dhe veprimet e autoriteteve kompetente.
