Gazetarja Klodiana Lala e ka cilësuar si censurë rregulloren e re të Gjykatës së Posaçme kundër Korrupsionit dhe Krimit të Organizuar për raportimin e medias. Asociacioni i Gazetarëve të Shqipërisë iu drejtua sot Gjykatës Kushtetuese, duke kërkuar pezullimin dhe shfuqizimin e dispozitave që prekin punën e gazetarëve.
Në një intervistë për News24, Lala deklaroi se rregullorja e re bie ndesh me ligjin dhe Kushtetutën. Sipas saj, kërkesa për akreditimin e gazetarëve përplaset me parimin që seancat gjyqësore duhet të jenë publike, përveç rasteve kur ligji parashikon ndryshe.
Gazetarja vuri në dukje gjithashtu se rregullorja hyn në fuqi në një periudhë kur disa figura të politikës janë në proces gjykimi, ndërsa të tjera pritet të përballen me gjykatën.
Duke folur për masat e sigurisë që zbatohen aktualisht për hyrjen në ambientet e gjykatës, Lala tha se gazetarët u nënshtrohen disa niveleve të kontrollit dhe se seancat regjistrohen në sistemin audio.
“Ne kontrollohemi në hyrje nga garda. Lëmë çantat, kalojmë në skaner. Kalojmë skanerin e dytë dhe më pas kemi kontroll fizik nga një punonjëse e autorizuar nga ligji, që kontrollon vajzat dhe gratë dhe një punonjës mashkull që kontroll burrat. Pra ka një sistem sigurie të sofistikuar. Të gjithë seancat janë të regjistruara në sistemin audio.
Pra do të thotë se kjo rregullore që ka miratuar zoti Erjon Bani, që është administrative që nuk është përqafuar nga Gjykata e Apelit të Posaçëm, bie ndesh me ligjin, kërkon akreditimin e gazetarëve ndërkohë që ligji dhe kushtetuta thonë se seancat janë publike përveç se në rastet kur ligji parashikon të kundërtën. Ne nuk lejohemi të kemi një celular. Gjë tjetër që përbën problematikë është akreditimi. Formulari kërkon adresën e shtëpisë. E dhënë e panevojshme.”, tha ajo.
Një tjetër pikë të rregullores që Lala e kundërshtoi lidhet me kërkesën që gazetarët të betohen se do të thonë të vërtetën. Sipas saj, një kërkesë e tillë është e papërshtatshme, pasi gazetarët nuk janë dëshmitarë në procesin gjyqësor.
“Tjetër skandal i madh është se gazetari duhet të betohet se duhet të thotë të vërtetën. Ne nuk jemi dëshmitarë të gjykatës”, shtoi ajo.
Lala paralajmëroi se çështja mund të dërgohet deri në Gjykatën Evropiane për të Drejtat e Njeriut në Strasburg, nëse kërkesa e gazetarëve nuk merr zgjidhjen e pretenduar prej tyre në Gjykatën Kushtetuese.
“Nëse këtë fitore se marrim në Gjykatën Kushtetuese, e cila mund të ndikohet, jam e bindur se e drejta jonë mund të fitohet në Gjykatën e Strasburgut.”, tha ajo.
