Gjykata e Apelit të Posaçëm ka pranuar kërkesën e ish-presidentit dhe kreut të Partisë së Lirisë, Ilir Meta, për të mos qëndruar më në kafazin e qelqtë gjatë seancave gjyqësore.
Vendimi është marrë nga gjyqtarja Saida Dollani, e cila ka urdhëruar që Meta të qëndrojë në sallën e gjyqit, pranë avokatit të tij, gjatë shqyrtimit të çështjes.
Meta doli nga kafazi i qelqtë gjatë seancës ku po shqyrtohet çështja që lidhet me afatet e paraburgimit. Seanca ishte shtyrë më herët për shkak të kundërshtimit ndaj pezullimit të këtyre afateve.
Sipas vendimit të Apelit, ish-presidenti do të marrë pjesë në procesin gjyqësor me avokatin përkrah, duke mos qëndruar më i ndarë prej tij në kafazin e qelqtë.
Ndërkohë, çështja tjetër që lidhet me masën e sigurisë ndaj Ilir Metës është shtyrë për ditën e nesërme. Meta ndodhet në paraburgim që prej 21 tetorit 2024, pas arrestimit me urdhër të SPAK-ut, ndërsa ndaj tij vijon procesi për akuzat e ngritura nga Prokuroria e Posaçme.
Vendimi i sotëm i Apelit lidhet vetëm me mënyrën e qëndrimit të Metës gjatë seancave dhe nuk përbën ndryshim të masës së sigurisë ndaj tij. Shqyrtimi i kërkesës për zëvendësimin e masës do të vijojë në seancën e radhës.