Komisioni parlamentar i Financave dhe Ekonomisë miratoi të hënën vetëm me votat e deputetëve socialistë projektligjin për pagat e magjistratëve të mbështetur edhe nga qeveria, me një formulë përllogaritëse me rritje 2% të pagës referuese.
Shqyrtimi parlamentar po ndodh në shkelje të afateve të vendosura nga Gjykata Kushtetuese dhe duke anashkaluar konfliktin gjyqësor mes gjykatave dhe prokurorisë.
Nismëtarja e projektligjit, Aulona Bylykbashi tha para komisionit se ishte Kuvendi ai që kishte diskrecionin kushtetues për të propozuar formulën e pagave, si dhe përgjegjësinë për një administrim të qëndrueshëm të buxhetit duke marrë parasysh edhe mendimin e qeverisë për efektin financiar.
“Po ofrojmë një zgjidhje që rregullon 3 gjëra; zbaton vendimin e Gjykatës Kushtetuese, ofron trajtim financiar brenda kufijve kushtetues dhe korrigjon pabarazitë brenda sistemit, por pa harruar qëndrueshmërinë e financiave publike,” tha deputetja socialiste, Bylykbashi.
Sipas propozimit, paga e re bazë për magjistratët do të llogaritet me konficentin 0.38 përqind të pagës së Presidentit, duke u rritur me 2% nga referimi i mëparshëm me koefiçentin 0.36%.
“Është një shifër që merr garancitë kushtetuese dhe ka marrë në konsideratë dhe mundësitë reale financiare të shtetit,” shtoi Bylykbashi.
Ajo theksoi gjithashtu se formula e re njeh dhe shtesat për vjetërsinë në punë dhe shtesat për shkak të funksioneve drejtuese. Formula u mbështet nga përfaqësuesit e Ministrisë së Drejtësisë dhe asaj të Financave të pranishëm në komision.
“Vendos parime të shëndosha për qartësi dhe siguri juridike,”pretendoi zëvendësministri i Drejtësisë, Tedi Dobi.
Drejtoresha e Përgjithshme e Buxhetit në Ministrinë e Financave, Mimoza Dhëmbi tha se kalkulimet e bëra nga kjo ministri për këtë variant të propozuar kanë rezultuar se janë kosto përballueshme për buxhetin, por shtoi se ishte kërkuar që të ndahej kostoja e prapambetur.
Sipas një dokumenti të Këshillit të Ministrave për Kuvendin, detyrimet financiare të akumuluara për periudhën 2023-2026 përllogariten në masën rreth 1.5 miliardë lekë. Po ashtu llogaritet një efekti vjetor i përsëritshëm prej rreth 500 milionë lekësh, ndërsa ndikimi financiar i përgjithshëm në buxhetin e shtetit arrin në rreth 2 miliardë lekë.
Deputetët e opozitës kundërshtuan projektligjin dhe sjelljen e mazhorancës me vendimin e Gjykatës Kushtetuese. “Është mosveprimi i organeve shtetërore që jemi sot tek ky hendek,” tha deputeti i Partisë Demokratike, Igli Cara.
Ndërkohë që Kuvendi bëhet gati të miratojë në seancë plenare formulën e re të pagave, Ministria e Financave dhe shoqata e gjyqtarëve janë në një konflik gjyqësor.
Gjykata Kushtetuese në shkurt të këtij viti shfuqizoi si të papajtueshëm me Kushtetutën formulën e mëparshme të miratuar nga Kuvendit duke i vendosur afat detyrues për gjetjen e një formule të re për pagat e magjistratëve deri më datë 31 korrik.
Ndërkohë, në vendimin e GJK parashikohej një mekanizëm zhbllokues me anë të të cilit formula e pagave të reja do të miratohej nga vetë organet drejtuese të gjyqësorit në rast se Kuvendi dështonte ta bënte këtë në afat.
Në bazë të këtij vendimi Këshilli i Lartë Gjyqësor dhe Këshilli i Lartë i Prokurorisë përcaktuan rritjen me pagë bazë referuese prej 222 mijë lekësh dhe 14 mijë lekë për shtesën e kualifikimit, si dhe u vendos që të kompesohej ‘ulja e fshehur’ e pagës e realizuar me ligjin e mëparshëm të shfuqizuar nga Kushtetuesja.
Ministria e Financave refuzoi të zbatonte këtë përllogaritje, ndërkohë që gjykatat depozituan padi në Gjykatën e Administrative të shkallës së parë, e cila ka vendosur deri më tani në favor të Gjykatës së Posaçme kundër Korrupsionit dhe Krimit të Organizuar.
