Ndryshon komandanti i Bazës Ajrore të Farkës, Bedri Kaloshi merr detyrën

Nënkolonel Bedri Kaloshi mori detyrën e komandantit të Bazës Ajrore të Farkës, duke pasuar në këtë post nënkolonel Ervin Buzin, i cili e drejtoi bazën gjatë viteve të fundit.

Në ceremoninë e ndërrimit të komandës morën pjesë Ministri i Mbrojtjes, Ermal Nufi, Shefi i Shtabit të Përgjithshëm të Forcave të Armatosura, gjenerallejtënant Arben Kingji, Komandanti i Forcës Ajrore, gjeneral brigade Edmond Voci, si dhe efektivë dhe personel i Bazës Ajrore të Farkës.

Gjatë fjalës së tij, ministri Nufi vlerësoi kontributin e Forcës Ajrore në përballimin e zjarreve dhe emergjencave civile, duke e cilësuar atë si një komponent kyç të Forcave të Armatosura.

“Pas tyre qëndrojnë njerëz që i shërbejnë Atdheut, komunitetit dhe shqiptarëve për t’u mbrojtur nga fatkeqësitë natyrore. Kjo është përmbushja e misionit!”, u shpreh Nufi.

Ministri solli në vëmendje edhe angazhimin e efektivëve gjatë situatave emergjente në zona të ndryshme të vendit.

“Janë ata njerëz që kërkoheshin me zor në orën katër e në pesë të mëngjesit në Krujë; e katër e në pesë të mëngjesit në Himarë; e katër e pesë të mëngjesit në Levan. Duke thënë njerëzit: ‘O Zot, kur do të vijë mëngjesi, që të vijë helikopteri’. Një falënderim i jashtëzakonshëm për të gjithë ju, për të gjithë Forcën Ajrore, për çdo efektiv!”, deklaroi ministri.