HAGË – Mbrojtja e Hashim Thaçit ka kundërshtuar përdorimin e transkripteve të paraqitura nga Zyra e Prokurorit të Specializuar (ZPS), duke argumentuar se ato nuk mund të shërbejnë si bazë për shpalljen fajtor të ish-presidentit të Kosovës.
Gjatë seancës në Gjykatën Speciale, avokatja Sophie Menegon deklaroi se mbrojtja i kundërshton transkriptet në tërësinë e tyre dhe jo vetëm pjesë të veçanta të tyre. Sipas saj, Prokuroria nuk ka përmbushur barrën e provës për të dëshmuar saktësinë dhe besueshmërinë e këtyre materialeve.
“ZPS-ja nuk e ka përmbushur barrën e provës dhe privilegjin e kundërvetëinkriminimit. Ne kundërshtojmë transkriptet në tërësinë e tyre dhe nuk kundërshtojmë fjali të caktuara të transkripteve. Nuk pritet që tani mbrojtja të ketë barrën e provës ose të akuzuarit të kenë barrën e provës për të vërtetuar pasaktësinë”, tha Menegon.
Avokatja argumentoi se transkriptet nuk duhet të pranohen si prova, përveç rasteve kur ato mbështeten nga ekzaminime shkencore dhe nga dëshmitarë që kanë pasur mundësinë t’i nënshtrohen kundërpyetjes.
Sipas Menegon, personat që kanë përgatitur transkriptet nuk janë identifikuar para mbrojtjes në një mënyrë që t’i lejonte asaj t’i merrte në pyetje lidhur me saktësinë e materialeve.
“Shpallja fajtor në këtë çështje nuk mund të bazohet vetëm në shkallë të gjerë në transkriptet e ZPS-së. Personat që i kanë bërë këto transkripte janë të panjohur dhe mbrojtja nuk e ka pasur mundësinë që t’i marrë në pyetje ata”, u shpreh avokatja.
Mbrojtja e Thaçit ka këmbëngulur se çdo vendim i gjykatës duhet të mbështetet në prova të verifikueshme dhe të besueshme, duke kundërshtuar përdorimin e materialeve për të cilat, sipas saj, nuk është dëshmuar në mënyrë të mjaftueshme autenticiteti dhe saktësia.
Në këtë kuadër, avokatja ka kërkuar që transkriptet të mos përdoren si bazë për përcaktimin e përgjegjësisë penale të Thaçit, duke ia atribuar Prokurorisë detyrimin për të provuar vlefshmërinë e provave të paraqitura para trupit gjykues.