Kryeministri izraelit Benjamin Netanyahu ka paralajmëruar se Izraeli do të vijojë operacionet ushtarake kundër infrastrukturës së Hezbollahut në jug të Libanit, duke deklaruar se “ka ende punë për të bërë”.
Në një deklaratë të publikuar me video, Netanyahu i cilësoi operacionet e fundit si “një tjetër fitore të madhe ndaj Hezbollahut” dhe pretendoi se ushtria izraelite ka shkatërruar pozicione të rëndësishme të organizatës në lartësitë Beaufort dhe Ali Taher.
“Ne shkatërruam fortesën e saj kryesore terroriste në Beaufort Ridge dhe Ali Taher Ridge”, deklaroi Netanyahu, duke e paraqitur operacionin si pjesë të përpjekjeve për të dobësuar kapacitetet ushtarake të Hezbollahut në jug të Libanit.
Kreu i qeverisë izraelite bëri të qartë se operacionet nuk do të ndalen, duke theksuar se ushtria do të vazhdojë të godasë objektivat e Hezbollahut në atë që Izraeli e konsideron si “zonë sigurie” në jug të Libanit.
“Politika jonë është e qartë: ne do të vazhdojmë të shkatërrojmë infrastrukturën terroriste në zonën e sigurisë në Liban”, tha Netanyahu.
Ai shtoi se Izraeli do të vijojë të eliminojë çdo kërcënim që, sipas tij, mund të rrezikojë sigurinë e vendit, duke sinjalizuar vazhdimin e operacioneve dhe pranisë ushtarake izraelite në këtë pjesë të Libanit.
Deklaratat e Netanyahut vijnë pas pretendimeve izraelite për shkatërrimin e objekteve të gjera nëntokësore të Hezbollahut në zonën e Ali Taherit, e cila konsiderohet nga Izraeli me rëndësi strategjike për aktivitetin ushtarak të organizatës.
Në fund të deklaratës së tij, Netanyahu iu drejtua drejtpërdrejt kundërshtarëve të Izraelit, duke paralajmëruar një përgjigje edhe më të ashpër në rast të një sulmi të ri.
“Nëse ende nuk e keni mësuar mësimin tuaj dhe vendosni të na sulmoni përsëri, do të merrni goditje edhe më të rënda”, tha kryeministri izraelit.
“Ka ende punë për t’u bërë dhe, me vullnetin e Zotit, ne do ta përfundojmë atë”, përfundoi Netanyahu.
Deklaratat tregojnë se Izraeli synon të ruajë presionin ushtarak ndaj Hezbollahut dhe të vijojë operacionet në Libanin jugor, në një kohë kur tensionet në rajon mbeten të larta.