Të shpenzosh më pak nuk do të thotë domosdoshmërisht të heqësh dorë nga çdo kënaqësi. Një fenomen interesant po bëhet gjithnjë e më i dukshëm mes konsumatorëve: në vend të një darke të shtrenjtë apo një blerjeje të madhe, njerëzit po zgjedhin kënaqësi më të vogla që kushtojnë më pak, por vazhdojnë të japin ndjesinë e luksit.
Boston Globe e analizon sot fenomenin që po quhet “treat economy” ose ekonomia e kënaqësive të vogla. Ideja është e thjeshtë: kur buxheti bëhet më i ngushtë, një person mund të mos justifikojë më një darkë prej qindra dollarësh, por vazhdon të jetë i gatshëm të blejë një ëmbëlsirë artizanale, një kafe më të mirë, një shishe vere të veçantë apo edhe pak havjar për një mbrëmje në shtëpi.
Të dhënat tregojnë se fenomeni nuk është i vogël. Një studim i SurveyMonkey i cituar nga gazeta zbuloi se 62% e amerikanëve i lejojnë vetes të paktën një kënaqësi të vogël dhe të përballueshme çdo muaj, ndërsa ushqimi dhe pijet janë ndër kategoritë kryesore ku shpenzohen këto para.
Në pastiçeri, kjo mund të jetë një ëmbëlsirë e punuar mirë. Në vend që një familje të shpenzojë për një darkë të plotë në restorant, mund të blejë bukë artizanale dhe disa ëmbëlsira të veçanta për në shtëpi. Në kategorinë e pijeve, konsumatorët po eksperimentojnë me kafe, çaj, matcha dhe përzierje që u lejojnë të krijojnë në shtëpi pije të ngjashme me ato të kafeneve.
Edhe vera po ndjek një logjikë interesante. Disa konsumatorë po blejnë më pak shishe, por po zgjedhin një produkt më të mirë. Në vend të disa verërave të lira, zgjedhin një shishe më të kushtueshme dhe e kthejnë darkën në shtëpi në një rast të veçantë.
Po kështu, ushqimet e gatshme cilësore në supermarkete po fitojnë terren si alternativë ndaj restoranteve. McKinsey ka raportuar se rreth një e katërta e konsumatorëve blejnë ushqime të përgatitura në dyqane si zëvendësim për një vakt në restorant.
