Mavijosje, fraktura dhe dëmtime të tjera fizike e psikologjike janë dokumentuar te azilkërkuesit e kthyer nga Mbretëria e Bashkuar në Francë në kuadër të skemës kontroverse “një brenda, një jashtë”, sipas të dhënave të mbledhura nga një shërbim shëndetësor francez.
Sipas “The Guardian”, Samusocial de Paris ka dokumentuar 90 persona të kthyer në Francë nga Britania e Madhe mes 22 janarit dhe 7 qershorit 2026. Raporti evidenton raste me shenja që përputhen me dhunë fizike dhe psikologjike, ndërsa disa prej azilkërkuesve kanë pasur nevojë për trajtim spitalor ose psikiatrik.
Të gjithë personat e përfshirë në të dhënat e raportit janë burra të rinj, kryesisht në të 20-at dhe fillim të të 30-ave. Ata vijnë kryesisht nga vende të prekura nga luftërat dhe persekutimi, përfshirë Eritrenë, Sudanin dhe Afganistanin.
Skema “një brenda, një jashtë” parashikon që një azilkërkues që ka kaluar Kanalin Anglez me një varkë të vogël të kthehet në Francë, ndërsa në këmbim një person tjetër që ndodhet në Francë mund të transferohet ligjërisht në Mbretërinë e Bashkuar për të kërkuar azil. Programi pilot, i cili ka shkaktuar debate të forta politike dhe humanitare, pritet të përfundojë më 1 tetor.
Samusocial de Paris është ngarkuar nga autoritetet shëndetësore të rajonit Île-de-France që t’u ofrojë kujdes personave të kthyer nga Britania gjatë tetë ditëve të para pas deportimit, pasi ata vendosen në një qendër strehimi në Paris.
Raporti shëndetësor thotë se gjatë konsultimeve janë konstatuar shenja në përputhje me dhunën fizike dhe psikologjike, si dhe probleme të lidhura me qëndrimin e zgjatur në paraburgim dhe kushtet që personat i kanë përshkruar si degraduese.
Një prej rasteve më të rënda lidhet me një azilkërkues që u dërgua në urgjencë për shkak të gjendjes së tij shëndetësore. Në dokumentacionin mjekësor përmenden mavijosje të shumta, dëmtime që përputhen me shtrëngimin nga prangat dhe dhimbje abdominale. Sipas dëshmisë së tij, dhimbjet ishin shkaktuar nga goditje të përsëritura.
Raporti përfshin gjithashtu 13 raste të dokumentuara në mënyrë më të detajuar, ku janë evidentuar lëndime fizike, probleme shëndetësore të përkeqësuara nga mungesa e trajtimit gjatë paraburgimit në Britani, si dhe çrregullime të shëndetit mendor.
Në një tjetër rast, një burrë u referua për trajtim urgjent psikiatrik pasi u shfaq i çorientuar dhe nuk ishte në gjendje të gjente rrugën për në konviktin ku ishte akomoduar.
Shërbimi shëndetësor francez ngre shqetësimin se personat e kthyer mund të kenë akses të kufizuar në trajtim të vazhdueshëm psikiatrik pasi rikthehen në Francë, duke rritur rrezikun që problemet e tyre shëndetësore të mos trajtohen në mënyrë të përshtatshme.
Sipas të dhënave të Ministrisë së Brendshme britanike, rreth 1,400 persona janë kthyer me forcë në Francë që prej nisjes së skemës në gusht 2025. Disa prej tyre më pas kanë tentuar të rikthehen në Mbretërinë e Bashkuar, përmes kamionëve ose duke përdorur sërish varka të vogla për të kaluar Kanalin Anglez.
Gjetjet e Samusocial de Paris i janë paraqitur një hetimi ndërpartiak të Asamblesë Kombëtare franceze mbi ndikimin e marrëveshjeve kufitare mes Francës dhe Mbretërisë së Bashkuar, të njohura si marrëveshjet e Le Touquet.
Raporti rekomandon krijimin e një mekanizmi të posaçëm për regjistrimin, hetimin dhe ndjekjen e akuzave për keqtrajtim nga autoritetet britanike. Gjithashtu, ai sugjeron që raste të tilla t’i raportohen prokurorit francez, në përputhje me nenin 40 të Kodit francez të Procedurës Penale.
Të dhënat e publikuara ngrenë pikëpyetje mbi mënyrën se si po zbatohet skema “një brenda, një jashtë” dhe mbi mbrojtjen shëndetësore dhe ligjore të personave që kthehen në Francë pas ndalimit në Mbretërinë e Bashkuar.