Deputetja e pavarur Marjana Koçeku ka zbuluar se ka marrë oferta politike nga subjekte të ndryshme, por ka vendosur të vijojë aktivit...
BOTA
“Seven Up!” i jep lamtumirën kamerës pas 62 vitesh, fëmijët që u filmuan në moshën 7-vjeçare festojnë 70-vjetorin
PiranjatPërditësimi i fundit 14 Shtator 2026, 21:16
Pas 62 vitesh, një nga eksperimentet televizive më të veçanta dhe prekëse në historinë e televizionit britanik po i afrohet fundit. Protagonistët e dokumentarit legjendar “Seven Up!”, të cilët u filmuan për herë të parë në vitin 1964 kur ishin vetëm shtatë vjeç, tashmë kanë mbushur 70 vjeç dhe do të rikthehen për herë të fundit në ekran.
Dy episodet 90-minutëshe të “70 Up, The Final Chapter” do të transmetohen në ITV dhe ITVX më 15 dhe 22 shtator, duke mbyllur një cikël dokumentar që nisi në vitin 1964 dhe është ndjekur nga publiku për më shumë se gjashtë dekada. “Seven Up!” u konceptua fillimisht si një dokumentar i vetëm për programin “World in Action” të Granada Television. Regjisori i filmit të parë ishte Paul Almond, ndërsa Michael Apted, atëherë një studiues i ri në ekip, propozoi që kamerat t’u riktheheshin të njëjtëve fëmijë çdo shtatë vjet. Në fillim, 14 fëmijë, dhjetë djem dhe katër vajza, u përzgjodhën nga shtresa të ndryshme shoqërore të Britanisë. Fëmijë nga familje të pasura dhe shkolla elitare u vendosën përballë bashkëmoshatarëve nga familje dhe institucione të klasës punëtore.
Ideja ishte të shihej nëse prejardhja dhe klasa shoqërore në të cilën lind një person përcaktojnë rrjedhën e jetës së tij.
Por gjatë dekadave, “Seven Up!” u shndërrua në diçka shumë më tepër se një eksperiment social. Publiku ndoqi jetën reale të protagonistëve, dashuritë, martesat, divorcet, lindjen e fëmijëve, karrierat, sukseset, dështimet, problemet financiare, sëmundjet dhe humbjet.Një prej historive më të veçanta është ajo e Tony Walker, i cili në moshën shtatë vjeçare ëndërronte të bëhej xhokej. Ai garoi me kuaj, por më vonë e la këtë ëndërr dhe u bë shofer taksie në Londër, ndërsa pati edhe disa role si aktor. Andrew Brackfield, nga ana tjetër, ndoqi një rrugë shumë më pranë asaj që pritej nga prejardhja e tij. Ai studioi në Kembrixh dhe ndërtoi një karrierë të suksesshme si avokat, duke u bërë partner në firmën Linklaters.
Bruce Balden, i cili si fëmijë dëshironte të shihte të atin që shërbente në ushtri në Rodezinë Jugore, u bë mësues. Sot, në pension, jeton në Berwick-upon-Tweed, këndon në korin e kishës dhe është vullnetar në shërbimin lokal të shpëtimit. Një tjetër histori e jashtëzakonshme është ajo e Neil Hughes. Në moshën shtatë vjeç ai ëndërronte të bëhej astronaut, por më vonë u përball me probleme serioze të shëndetit mendor dhe kaloi edhe një periudhë si i pastrehë. Më pas arriti të rindërtonte jetën e tij, duke u bërë këshilltar, predikues laik dhe aktiv në politikën lokale. Simon Busterfield, i cili u rrit në një institucion të Barnardo-s, më vonë krijoi familjen e tij dhe ia kushtoi jetën kujdesit për fëmijët. Sipas episodeve të fundit të serialit, ai dhe familja e tij janë kujdesur për më shumë se 120 fëmijë.
Nga 14 fëmijët që morën pjesë në dokumentarin e parë, dy kanë ndërruar jetë. Lynn Johnson, e cila punoi si bibliotekare për fëmijë, vdiq në vitin 2013. Nick Hitchon, i cili vinte nga një familje bujqësore në Yorkshire dhe më vonë u bë fizikant bërthamor në SHBA, vdiq nga kanceri në fyt në vitin 2023.
Megjithatë, Hitchon kishte dhënë një intervistë të fundit për “70 Up” pak para vdekjes dhe materiali është përfshirë në episodet finale.Në kapitullin e fundit rikthehen edhe dy protagonistë që kishin munguar prej vitesh. Charles Furneaux, i cili u largua nga seriali pas “21 Up” në vitin 1977 dhe më pas ndërtoi një karrierë si producent televiziv dhe krijues dokumentarësh, ka pranuar të shfaqet sërish. Edhe Susie Lusk, e cila vinte nga një familje e pasur dhe e kishte lënë shkollën në moshën 16-vjeçare, rikthehet në finalen e madhe pasi kishte zgjedhur të mos merrte pjesë në “63 Up”.
Finalja e serialit vjen gjithashtu pa Michael Apted, njeriun që e shndërroi “Seven Up!” në një projekt shumëvjeçar. Apted, i cili vazhdoi të rikthehej te protagonistët për dekada, vdiq në vitin 2021, në moshën 79-vjeçare.
“70 Up” është drejtuar nga fituesi i çmimit Oscar, Asif Kapadia, i njohur për dokumentarët “Amy”, “Senna” dhe “Diego Maradona”.
Pyetja që ka shoqëruar serialin që nga fillimi ka qenë nëse fëmija shtatëvjeçar do të bëhej personi që shikuesit panë në dekadat pasuese.Në fund, “Seven Up!” nuk arriti të provonte se fati i një njeriu është i përcaktuar që në moshën shtatë vjeç. Por dokumentari arriti të bëjë diçka shumë më të rrallë: të regjistrojë, pothuajse në kohë reale, mënyrën se si një person ndryshon dhe ndërton jetën e tij. Nga pamjet bardh e zi të vitit 1964 deri në vitin 2026, rrudhat, martesat, ndarjet, karrierat, dështimet, fëmijët, nipërit, mbesat dhe humbjet e protagonistëve janë shndërruar edhe në një kronikë unike të ndryshimeve të shoqërisë britanike.
Tashmë, në moshën 70-vjeçare, fëmijët që kamerat i takuan për herë të parë kur ishin shtatë vjeç do t’i japin lamtumirën ekranit, duke mbyllur një histori televizive që zgjati 62 vjet.
