Presidenti i Serbisë, Aleksandër Vuçiç në një deklaratë për mediat serbe, ka njoftuar se do të japë dorëheqjen.
Ai ka thënë se do japë dorëheqjen nga posti i kreut të shtetit më 27 shtator.
“Dua t’ju njoftoj se më 27 shtator do të jap dorëheqjen nga posti i presidentit. Atë mbrëmje do t’u drejtohem qytetarëve dhe do t’i falënderoj për mbështetjen. Kam qenë presidenti i Republikës për kohën më të gjatë që nga vendosja e sistemit shumëpartiak në vendin tonë. Këtë nuk do të mund ta bëja pa qytetarët e këtij vendi. E vetmja gjë që mund të them është se i kam shërbyer me besnikëri Serbisë dhe qytetarëve të saj, me përkushtim dhe duke luftuar”, u shpreh Vuçiç.
Ky vendim i Aleksandër Vuçiç vjen pas muajsh protestash masive në Serbi, të nisura pas shembjes së çatisë së stacionit hekurudhor në Novi Sad, ku humbën jetën 16 persona. Protestat, të udhëhequra kryesisht nga studentët, u shndërruan në një lëvizje të gjerë kundër korrupsionit dhe qeverisjes së Vuçiç, duke ushtruar presion të vazhdueshëm mbi pushtetin.
Sakaq, më 25 tetor të këtij viti, Serbia do të mbajë zgjedhje të jashtëzakonshme parlamentare. Më 9 shtator, Vuçiç shpërndau zyrtarisht Kuvendin dhe firmosi dekretin për mbajtjen e zgjedhjeve, pas muajsh tensionesh politike dhe protestash.
Vetë Vuçiç, mandati i dytë dhe i fundit presidencial i të cilit do të përfundonte në vitin 2027, do të udhëheqë listën zgjedhore të Partisë Përparimtare Serbe (SNS) dhe është kandidati i saj për postin e kryeministrit.
