Një burrë me origjinë indiane është dhunuar barbarisht në orët e para të së shtunës në qendër të Tebës, në Greqi.
Për ngjarjen, policia ka arrestuar tre persona, mes tyre dy shtetas shqiptarë dhe një grek, të cilët dyshohet se janë përfshirë në sulm.
Sipas mediave greke, ngjarja ka ndodhur rreth orës 06:00 në rrugën “Dirkis”, ku tre të dyshuarit dyshohet se kanë sulmuar burrin.
Sipas informacioneve fillestare, viktima ka tentuar të largohet drejt zonës qendrore për këmbësorë të Tebës, por autorët e kanë ndjekur dhe kanë vijuar ta godasin.
Pas denoncimit të ngjarjes, Policia Greke ka nisur hetimet për identifikimin e personave të përfshirë, duke përdorur edhe pamjet e kamerave të sigurisë.
Tre të dyshuarit janë identifikuar dhe arrestuar të dielën. Hetimet vijojnë për zbardhjen e plotë të rrethanave dhe motivit të sulmit, ndërsa autoritetet greke po marrin në pyetje personat e arrestuar.
