Gazetari Artan Hoxha ka hedhur akuza të forta lidhur me ndërhyrjen e shtetit ndaj kompanisë Delvina Gas, duke deklaruar se ish-ministrja e Infrastrukturës dhe Energjisë, Belinda Balluku, ka shkuar personalisht në ambientet e kompanisë për të drejtuar aksionin që çoi në bllokimin e aktivitetit.
I ftuar në emisionin “Çim Peka LIVE” në SYRI TV, Hoxha tha se Balluku nuk ia kishte deleguar aksionin strukturave të tjera shtetërore, por kishte qenë vetë në krye të operacionit.
“Ka qenë Belinda Balluku me dorën e vet, me drejtorin e policisë së qarkut, me drejtorin e policisë kriminale, me shefin e komisariatit, me shefin e IKMT-së”, deklaroi Hoxha.
Sipas gazetarit, ndërhyrja ndodhi në një moment kur Delvina Gas ishte pranë nisjes së aktivitetit, pasi kishte kryer investime në infrastrukturën për përpunimin dhe shfrytëzimin e gazit.
Hoxha pretendoi se aksioni u shoqërua me bllokimin e aktivitetit të kompanisë dhe shpalljen në kërkim të aksionerit kryesor, ndërsa administratori dhe dy inxhinierë amerikanë u arrestuan.
Ai tha se në atë kohë autoritetet e paraqitën rastin si zbulimin e një TEC-i pa leje, ndërsa ngriti dyshime mbi arsyet e vërteta të ndërhyrjes.
“Dhe e nxorën lajmin që kemi kapur një rafineri pa leje që po ndërtohet në Delvina Gas. Dhe i shpallën në kërkim aksionerin kryesor”, u shpreh Hoxha.
Më tej, gazetari pretendoi se pas këtyre veprimeve ndaj kompanisë kishte pasur përpjekje për t’i kaluar kontrollin e saj personave të tjerë, duke e lidhur këtë me interesin për fushën gazmbajtëse të Delvinës.
Hoxha deklaroi gjithashtu se Balluku kishte dhënë një intervistë në hyrje të rafinerisë më 29 korrik të vitit të kaluar, e cila, sipas tij, nuk ishte publikuar më pas.
“Ka shkuar vetë ministrja, nuk ia ka lënë as ministrit të Brendshëm ta bëjë atë punë, as drejtorit të policisë, ka shkuar vetë”, tha Hoxha.
