Incident në hapësirën ajrore baltike, një avion luftarak i NATO-s rrëzon një dron në Lituani

Një avion luftarak i NATO-s rrëzoi një mjet ajror pa pilot në Lituani  pak pas mesnatës të hënën, njoftoi Qendra Kombëtare e Reagimit ndaj Krizave në Lituani.

Droni, i cili besohet se ka hyrë në hapësirën ajrore lituaneze nga drejtimi i Bjellorusisë, u rrëzua pranë fshatit Pratkunai, në pjesën jugore të Lituanisë, jo shumë larg Kaunas, qytetit të dytë më të madh në vendin baltik, tha qendra.

Presidenti lituanez Gitanas Nausëda theksoi nëpërmjet X: “Falënderoj stafin e Aleancës për reagimin e tyre të menjëhershëm. Me Rusinë që po përshkallëzon agresionin e saj kundër Ukrainës, kjo gatishmëri është jetike për rajonin tonë. Së bashku me aleatët tanë të NATO-s, Lituania do të mbrojë hapësirën e saj ajrore”.

Ministria e Mbrojtjes e Lituanisë falënderoi posaçërisht pilotët italianë në NATO për reagimin e tyre të shpejtë dhe të përgjegjshëm.

Avionë luftarakë të NATO-s dhe avionë të tjerë kanë patrulluar qiellin e Letonisë, Lituanisë dhe Estonisë që kur tre shtetet baltike, dikur pjesë e Bashkimit Sovjetik, iu bashkuan Organizatës së Traktatit të Atlantikut të Veriut në vitin 2004.

Avionët e misionit të NATO-s rrëzuan mjete ajrore pa pilot ukrainase në hapësirën ajrore të Estonisë në maj dhe në hapësirën ajrore të Letonisë në qershor dhe gusht.

Ndërhyrja e dronëve ushtarakë në hapësirën ajrore të shteteve fqinje me Rusinë ngre shqetësime në lidhje me përhapjen e luftës që ajo po zhvillon kundër Ukrainës.

Kievi po shton sulmet me dronë me rreze të gjatë veprimi kundër Rusisë, duke përfshirë edhe synimin e zonave në bregdetin rus në Detin Baltik. Disa dronë ukrainas kanë zbarkuar në Finlandë, Letoni, Lituani dhe Estoni.

Pala ukrainase fajëson Moskën, duke theksuar se sistemet ruse të luftës elektronike janë përgjegjëse.