Incident në Detin Baltik, fregata ruse lëshon flakadanë drejt helikopterit danez

Një fregatë ruse lëshoi dy flakadanë drejt një helikopteri ushtarak danez në ujërat ndërkombëtare pranë brigjeve të Danimarkës të hënën, duke e rrezikuar nga afër mjetin ajror, njoftoi ushtria e vendit nordik, anëtar i NATO-s.

Helikopteri ushtarak Fennec ishte në një mision rutinë për të fotografuar fregatën ruse, bëri të ditur Komanda Daneze e Mbrojtjes në një deklaratë të publikuar të hënën në mbrëmje. Njëri prej flakadanëve kaloi shumë pranë helikopterit, thuhej në deklaratë.

Flakadanët janë mjete piroteknike që zakonisht përdoren si sinjal paralajmërues në det.

Ministri i Jashtëm i Danimarkës, Lars Lokke Rasmussen, e cilësoi incidentin si “të papranueshëm” dhe tha se ai mund të kishte rrezikuar jetën e njerëzve.

“Për sa na përket neve, Danimarka po punon për të garantuar që të gjitha anijet të mund të lundrojnë në mënyrë paqësore në ujërat daneze, por Rusia po e zhvendos gradualisht kufirin e asaj që e konsideron sjellje të pranueshme”, tha ai në një deklaratë të martën.

Ai shtoi se kishte thirrur ambasadorin rus në Danimarkë për një takim.

Ambasada ruse nuk iu përgjigj menjëherë një kërkese për koment jashtë orarit zyrtar të punës.