“Mund të jetë i armatosur dhe i rrezikshëm”, policia greke në këmbë pas arratisjes së Alket Rizait
Vijon kërkimi për kapjen e të dënuarit Alket Rizai, i cili nuk u kthye në burgun e Domokos pas përfundimit të lejes së tij. Ai duhej të paraqitej në institucionin e vuajtjes së dënimit në orën 08:30 të së hënës, më 14 shtator, por ende nuk është gjetur.
Rizai dyshohet gjithashtu se është përfshirë në një incident me të shtëna armësh në Anavisosë.
“Që nga momenti që nuk u kthye, konsiderohet i arratisur dhe tashmë e gjithë përgjegjësia për gjetjen dhe arrestimin e tij bie mbi Policinë Greke”, deklaroi për ERT nënkryetari i Federatës Panhelenike të Policëve, Christos Syndrevelis.
Ai paralajmëroi se rasti nuk është i zakonshëm, pasi Rizai mund të jetë i armatosur dhe i rrezikshëm, çka e bën operacionin e policisë veçanërisht të vështirë.
Sipas autoriteteve, Rizai ka marrë gjithsej 16 leje daljeje që nga viti 2021, por në të gjitha rastet e mëparshme ishte kthyer në burg.
Lidhur me këtë, Syndrevelis tha se institucioni i lejeve për të burgosurit duhet të vijojë të ekzistojë, por kushtet për dhënien e tyre duhet të përditësohen, duke marrë parasysh edhe nivelin e rrezikshmërisë së çdo të dënuari.
Ai theksoi gjithashtu se, ndonëse policia nuk vendos për dhënien e lejeve, në fund është ajo që duhet të kërkojë dhe arrestojë të burgosurin në rast se ai nuk kthehet, duke marrë përsipër një operacion që mund të jetë tepër i rrezikshëm.
