Gjykata e Lartë vendosi të martën më 15 shtator lënien në fuqi të masës së sigurimit “arrest në burg” të caktuar më parë ndaj kryetarit të Bashkisë së Tiranës, Erion Veliaj nga Gjykata e Posaçme e Apelit. Çështja u shqyrtua në dhomë këshillimi dhe arsyetimi i trupës gjyqësore nuk është bërë ende me dije për mediat.
Para fillimit të seancës, pranë Gjykatës së Lartë u mblodhën dhjetëra protestues, të cilët kërkuan drejtësi. “O gjyqtar bëj drejtësi, lër Veliajn në qeli”; “Rama në burg Veliaj në burg”, ishin dy nga thirrjet e protestuesve, të cilët e mirëpritën vendimin e gjykatës për lëniën në fuqi të masës së arrestit.
Rishqyrtimi në Gjykatën e Lartë i rekursit të Veliajt ndaj masës së sigurimit, u krye pasi Gjykata Kushtetuese vendosi më 25 maj të rikthente çështjen, duke kërkuar arsyetimin e proporcionalitetit të masës së arrestit me burg, në raport me statusin e tij si person i zgjedhur, si dhe të pretendimit mbi cënimin e dinjitetit dhe prezumimit të pafajësisë.
Veliaj kërkoi shfuqizimin si të papajtueshëm me Kushtetutën e Republikës së Shqipërisë të dy vendimeve të Gjykatës së Posaçme, marrë në datat 9 shkurt dhe 12 shkurt të vitit të kaluar, atë të Apelit të Posaçëm të datës 13 mars 2025, si dhe të vendimit të 8 korrikut 2025 të Gjykatës së Lartë për rrëzimin e rekursit të tij.
Gjykata Kushtetuese e shqyrtoi çështjen në themel vetëm në drejtim të pretendimeve për aspektin procedural dhe atë substancial të caktimit të masës së sigurimit “arresti në burg” ndaj Veliajt. Me shumicë votash, trupa e Gjykatës Kushtetuese pranoi dy prej pretendimeve të Veliajt, ai që kishte të bënte meproporcionalitetin e masës së sigurimit, të lidhur me të drejtën si person i zgjedhur, si dhe lidhur me qëndrimin në kafazin e xhamtë, pasi kryebashkiaku pretendoi se sillte cënim të dinjitetit dhe prezumimit të pafajësisë.
Më 25 shtator të vitit të kaluar, Veliaj arriti të fitonte në Gjykatën Kushtetuese betejën për shkarkimin e tij, pas një procedure të iniciuar nga kryeministri Edi Rama.
Veliaj ndodhet në qeli prej 10 shkurtit 2025, kur u arrestua nga Prokuroria e Posaçme për veprat penale të korrupsionit dhe pastrimit të parave përmes një skeme që përfshin edhe bashkëshorten e tij, Ajola Xoxa. Sipas SPAK, Veliaj dhe Xoxa kanë përfituar rreth 1 milion euro nga kjo skemë e dyshuar korruptive, para që janë përdorur kryesisht për stilin e jetesës dhe blerje luksoze në internet. Veliaj i ka mohuar akuzat dhe zhvilloi një betejë gjyqësore ndaj prokurorit të çështjes së tij, Ols Dado.
