Më 24 maj, Donald Trump Jr. po festonte në Bahamas. Ishte nata e fundit e dasmës së tij, një festë luksoze tre-ditore e mbajtur në dy ishuj privatë ultra-ekskluzivë. Një tortë funfetti me pesë kate ishte sjellë me helikopter nga Florida, përpara se të ftuarit të vendoseshin në vilat e tyre buzë oqeanit.
«Ishte gjithçka që ëndërronim dhe më shumë», shkroi më vonë gruaja e tij në Instagram.
Mirëpo, rrjeti investigativ amerikan "ProPublica" ka zbuluar se kjo ëndërr u financua shumë nga një bamirës sekret: Umar Kremlev, një oligark rus i afërt me Presidentin Vladimir Putin, i cili mbuloi shpenzimet e dasmës me qindra mijëra dollarë.
Oligarku pagoi për të dhënë me qira një nga ishujt privatë, ku u mbajt një pritje dhe ku fjetën të ftuarit. Ai mbuloi gjithashtu edhe çështje të tjera të rëndësishme, si shfaqja e fishekzjarrëve, dhe ekipi i tij ndihmoi në planifikimin e ngjarjes. Kremlev është kreu i Shoqatës Ndërkombëtare të Boksit, një grup sportiv i përfshirë në skandale që është financuar nga gjigandi shtetëror rus i energjisë Gazprom. Pagesat e dasmës erdhën nga një entitet i lidhur me IBA-n në Dubai që shoqata e boksit e përdor për transaksione financiare.
Lista e të ftuarve numëronte rreth 50. Ajo përfshinte kunatin e Trump Jr., Jared Kushner, Eric Trump - dhe Kremlev, një burrë imponues me kokë të rruar që flet pak anglisht. Oligarku ishte pjesë e një grupi të madh, prania e të cilit i hutonte të pranishmit e tjerë. Ata ndonjëherë qëndronin mënjanë, duke folur rusisht.
Marrëdhënia e Kremlevit, e cila më parë nuk ishte raportuar, me Trump Jr. përfaqëson një zhvillim të jashtëzakonshëm: një anëtar i rrethit të Putinit mbështet financiarisht djalin e presidentit dhe fiton qasje të ngushtë me familjen Trump. Për një dekadë, qeveria e Putinit, e konsideruar si një nga kundërshtarët kryesorë të SHBA-së, është akuzuar për përpjekje për të ndikuar në zgjedhjet amerikane. Përpjekjet e Rusisë për të krijuar kontakte me familjen Trump para zgjedhjeve të vitit 2016 shpërthyen në polemika që përcollën pjesën më të madhe të mandatit të parë të presidentit.
“Nëse unë po paguaj për dasmën tënde, në një moment, do të më kesh diçka borxh”, tha Frank Montoya Jr., një zyrtar karriere në pension i FBI-së, i cili mbajti role të larta në kundërzbulim. Oligarkë si Kremlev shpesh veprojnë në koordinim me qeverinë ruse. Ndërsa është e paqartë nëse kjo ka ndodhur këtu, Trump Jr. e vendosi veten në një pozicion të pasigurt, tha Montoya. “Kjo duhet të jetë e paimagjinueshme për djalin e presidentit. Fundi i historisë.”
Holden Triplett, i cili shërbeu si drejtor i kundërzbulimit të Trump në Këshillin e Sigurisë Kombëtare gjatë mandatit të tij të parë, tha se inteligjenca ruse shpesh kërkon të ndërtojë lidhje me zyrtarët e qeverisë amerikane dhe anëtarët e familjeve të tyre. "Paratë janë një metodë e provuar dhe e vërtetë për të fituar akses", tha Triplett, i cili gjithashtu punoi për FBI-në në Moskë.
Në ditët para dasmës së Trump Jr., Kremlev ishte në Kinë si pjesë e delegacionit që shoqëronte Putinin, sipas mediave shtetërore kineze. Një muaj më parë, Putini i kishte dhënë atij një nder shtetëror, Urdhrin e Miqësisë. Qeveria ukrainase ka vendosur sanksione personalisht ndaj Kremlev, duke përmendur afërsinë e tij me Putinin dhe shërbimet ruse të sigurisë.
Në përgjigje të pyetjeve të hollësishme, një zëdhënës i Trump Jr. nuk i kundërshtoi pagesat e dasmës nga Kremlev. "Umar është një mik personal i Donit", tha ai. Zëdhënësi tha se Kremlev "nuk është dikush me të cilin ai ka një marrëdhënie biznesi" dhe se burrat u takuan përmes një miku të përbashkët në botën e gjuetisë dhe u lidhën nga dashuria e tyre për boksin dhe aktivitetet në natyrë.
Kurse zyra e shtypit e Umar Kremlev në një deklaratë tha: “Z. Kremlev dhe Z. Trump Jr kanë një marrëdhënie miqësore” dhe ata u takuan për herë të parë “disa vite më parë”.
Kremlev priti Trump Jr. në një aktivitet në Stamboll në shtator 2025. Shoqata Ndërkombëtare e Boksit
Presidenti rus Vladimir Putin, majtas, me Umar Kremlev, gjatë një eventi në Moskë në shtator 2022 Sputnik/Reuters
Sondazh
Lexo gjithashtu
