Konflikti për pagat e magjistratëve u shndërrua në një përplasje të re publike mes kryeministrit Edi Rama dhe drejtësi...
BOTA
OKB kërkon hetime për Gazën! Ngrihen shqetësime për krime lufte pas gjetjes së mijëra trupave
PiranjatPërditësimi i fundit 15 Shtator 2026, 14:53
Shefi i OKB-së për të Drejtat e Njeriut ka ngritur shqetësime për respektimin e ligjit ndërkombëtar dhe mundësinë e krimeve të luftës në Gaza, pas nxjerrjes së qindra trupave nga rrënojat. Më shumë se 630 trupa janë gjetur mes nëntorit 2025 dhe shtatorit 2026, ndërsa mbi 8 mijë persona rezultojnë të zhdukur. OKB kërkon hetime ndërkombëtare, ruajtjen e provave dhe identifikimin e viktimave.
Shefi i OKB-së për të Drejtat e Njeriut, Volker Türk, ka ngritur shqetesime lidhur me respektimin e ligjit ndërkombëtar dhe mundësinë e krimeve të luftës në Gaza, pas nxjerrjes së qindra trupave dhe mbetjeve njerëzore nga rrënojat.
Sipas tij, procesi i vështirë i rikuperimit, pothuajse tre vjet pasi shumë ndertesa u shkatërruan nga bombardimet izraelite, po konfirmon frikërat e familjeve të personave të zhdukur, ndërsa një pjesë e madhe mund të jenë nën rrënoja.
Mbrojtja Civile Palestineze raporton se më shumë se 630 trupa janë nxjerrë nga ndërtesat në të gjithë Gazën midis nëntorit 2025 dhe shtatorit 2026, ndërsa numri i personave të zhdukur vlerësohet mbi 8 mijë.
Vetëm midis 27 qershorit dhe 27 gushtit, ekipet palestineze nxorën 233 nga 407 trupat që besohej se ndodheshin nën rrënojat e 20 ndërtesave, në qytetin e Gazës. Ndërsa këtë muaj, ekipet raportuan gjetjen e 96 trupave në zonën Az Zeitoun.
Türk tha se këto të dhëna mund të jenë vetëm “maja e ajsbergut. Ai kërkoi që hetuesve ndërkombëtarë t’u lejohet hyrja në të gjitha pjesët e Gazës dhe që provat e shkeljeve të ruhen për shkak të procedurave ligjore. Sipas tij, duhet të dokumentohen dhe identifikohen viktimat, të ruhen të dhënat mjekoligjore dhe mostrat biologjike, të regjistrohen vendet e varrimit dhe familjet të njoftohen për fatin e të afërmve të tyre.
Komisioneri i Lartë riktheu në vëmendje edhe shqetësimet e mëparshme të Zyrës së OKB-së për të Drejtat e Njeriut lidhur me përdorimin e armëve në zona të populluara të Gazës, duke ngritur pikëpyetje mbi respektimin e parimeve të dallimit, proporcionalitetit dhe masave paraprake në sulme.
Türk theksoi se rikuperimi dhe varrosja e viktimave nuk mjafton për të përcaktuar rrethanat e vdekjes. Ai kërkoi hetime efektive për sulmet ku janë vrarë anëtarë të familjeve, përfshirë fëmijë, gra dhe persona me aftësi të kufizuara, duke thënë se në rastet kur konstatohen shkelje, përgjegjësit duhet të mbajnë përgjegjësi.
