Turqi, 150 të arrestuar në protestë kundër ndalimit të grupeve LGBTQ+

Autoritetet turke arrestuan të paktën 150 persona të martën pasi policia shpërndau një tubim jashtë një gjykate në Stamboll, i cili ishte planifikuar të protestonte kundër arrestimeve të fundit të grupeve LGBTQ+, thanë dëshmitarët.

Arrestimet shënojnë përshkallëzimin më të fundit në atë që grupet e të drejtave të njeriut dhe figurat e opozitës e kanë përshkruar si një fushatë në zgjerim kundër komunitetit LGBTQ+ .

Javën e kaluar, autoritetet bastisën zyrat e shoqatave, bllokuan faqet e internetit dhe burgosën “të dyshuar” në disa zona në të gjithë vendin.

Sot, të martën, ishte planifikuar një tubim, të cilin policia e pengoi jashtë gjykatës.

Protestuesit po brohorisnin “Rroftë jeta që sfidon urrejtjen” kur policia sulmoi.

Protesta pasoi bastisjet gjithëpërfshirëse që synonin shoqatat LGBTQI+ në disa rajone turke, si pjesë e operacionit “Familja ime është e sigurt” , i cili sipas qeverisë synon të mbrojë fëmijët dhe vlerat familjare.

Komisioneri për të Drejtat e Njeriut i Këshillit të Evropës, Michael O’Flaherty, tha se ishte i shqetësuar për arrestimet, bastisjet dhe kufizimet e internetit që synojnë anëtarët e komunitetit LGBTQ+ dhe mbrojtësit e të drejtave të njeriut.

Ai gjithashtu vuri në dukje se referencat për “vlerat familjare” ose “mbrojtjen e fëmijëve” nuk mund të justifikojnë në vetvete kufizimet e të drejtave të njeriut dhe bëri thirrje për lirimin e kujtdo që është ndaluar për punë që lidhet me të drejtat e njeriut ose shoqërinë civile.

Një gjykatë turke të hënën la në burg 16 persona, në pritje të gjyqit, në provincën perëndimore të Izmirit , si pjesë e operacionit, tha zyra e prokurorit lokal.

Ministri i Drejtësisë Akin Gurlek tha të dielën se hetimet, të koordinuara nga prokurorët në Stamboll, Ankara, Izmir, Ajdin dhe Mersin, përfshinë 162 të dyshuar, nëntë shoqata dhe 13 biznese në 15 provinca.

Autoritetet arrestuan të paktën 26 persona në Stamboll dhe 21 në Ankara gjatë fundjavës, ndërsa bastisën zyrat e disa shoqatave LGBTQ+ .

Autoritetet turke kanë bllokuar gjithashtu qasjen në faqet e internetit dhe llogaritë e mediave sociale që u përkasin shoqatave të ndryshme LGBTQI+, individëve dhe mediave të pavarura, përfshirë llogarinë në X të degës së Amnesty International në Turqi.